२०७६ असोज २६ गते प्रकाशित
काठमाडौं । दुई दिने नेपाल भ्रमणका लागि आएका चिनियाँ राष्ट्रपति सी चिनफिङको सम्मानमा राष्ट्रपति विद्यादेवी भण्डारीले सोल्टी होटलमा रात्रिभोज आयोजना गर्नुभएको छ ।
आज साँझ हुने रात्रिभोजमा नेपालका उच्चपदस्थ व्यक्तिहरु सहभागी हुँदै छन । उक्त रात्रिभोजमा सीमित उद्योगी व्यवसायीलाई राष्ट्रपति कार्यालयले निम्तो पठाएको छ ।
रात्रीभोजमा उद्योग वाणिज्य महासंघबाट दुई जना सहभागी हुँदै छन, भने नेपाल चेम्बर अफ कमर्सबाट एक जना र नेपाल उद्योग परिसंघबाट पनि एक जना सहभागी हुँदै छन । नेपाल बैंकर्स संघका अध्यक्ष पनि सहभागी हुनेछन ।
आज साँझ ७ः३० बजेदेखि सुरु हुने रात्रिभोजमा २ सय ५० जना सहभागी हुँदै छन । व्यवसायी स्रोतका अनुसार नेपाल उद्योग वाणिज्य महासंघकी अध्यक्ष भवानी राणा, उपाध्यक्ष चन्द्रप्रसाद ढकाल सहाभागी हुने निश्चित भएको छ ।
त्यस्तै, उद्योग परिसंघका अध्यक्ष सतिस मोर हाल भारतमा रहेका छन् भने परिसंघकै निवर्तमान अध्यक्ष हरिभक्त शर्मा रात्रिभोजमा सहभागी हुनेछन ।
त्यस्तै, नेपाल चेम्बर अफ कमर्सका अध्यक्ष राजेशकाजी श्रेष्ठलाई पनि निम्तो आएको बताइएको छ । उद्योगी व्यवसायीहरुलाई छुट्टै भेट नदिएकोले उक्त रात्रिभोजमा नै केही एजेण्डामा छलफल गर्ने रात्रिभोजमा सहभागी हुने व्यवसायीहरुले बताएका छन ।
वि.सं.२०७६ असोज २५ शनिवार १५:४३ मा प्रकाशित