२०७६ असोज २७ गते प्रकाशित
काठमाडौं । शिव श्री हाइड्रोपावको आइपीओमा संगठित संस्थाहरुले समेत आवेदन दिन सक्ने भएका छन । यस आइपीओमा न्यून आवेदन परेपछि संगठित संस्थाहरुले समेत भर्न पाउने व्यवस्था गरिएको हो ।
बिक्री प्रबन्धक सिद्धार्थ क्यापिटलका अनुसार संस्थाहरुले असोज २५ गतेदेखि नै आवेदन दिन पाउने व्यवस्था गरिएको जानकारी दिएको छ ।
तर शनिबार र आइतबार सार्वजनिक विदा भएकाले वास्तविक रुपमा भने सोमबारबाट यसमा आवेदन दिन संस्थागत लगानीकर्तालाई सजिलो भएको छ । मेरो सेयरबाट भने विदाको दिन पनि आवेदन दिन सकिन्छ ।
यो आइपीओमा सोमबार ४ बजेसम्ममा ४ लाख ९० हजार ३४० कित्ताका लागि आवेदन परेको छ । बिक्री प्रबन्धक सिद्धार्थ क्यापिटलका अनुसार १० हजार १११ जना आवेदकले ४ करोड ९० लाख ३४ हजार रुपैयाँ बराबरको आवेदन दिएका छन।
यसआधारमा अझै २८ लाख ६० हजार ८०० कित्तामा आवेदन पर्न बाँकी रहेको देखिन्छ । शिव श्री हाइड्रोपावरले असोज १६ गतेबाट ३३ करोड ५१ लाख १४ हजार रुपैयाँ बराबरको आइपीओ बिक्री खुला गरेको हो ।
कम्पनीले यसअघि आयोजना प्रभावित स्थानीयले नकिनेको ११ लाख ३६ हजार ५४० कित्ता र सर्वसाधारणलाई छुट्याइएको २२ लाख १४ हजार ६ सय कित्ता गरी कुल ३३ लाख ५१ हजार १४० कित्ता आइपीओ बिक्री खुला गरेको हो ।
यसमध्ये २ लाख ६८ हजार ०९१ कित्ता कर्मचारीलाई सुरक्षित गरिएको छ ।चालु आर्थिक वर्षमा शिव श्री आइपीओ बिक्री गर्ने पहिलो कम्पनी हो । यो आइपीओ अब कात्तिक १५ गतेसम्म भर्न सकिनेछ ।
यसमा न्यूनतम १० कित्तादेखि अधिकतम १० लाख कित्तासम्मका लागि आवेदन दिन पाइनेछ । शिव श्री हाइड्रोपावरको कुल लागत ४ अर्ब ९८ करोड ५९ लाख ९६ हजार ५१४ रुपैयाँ रहेको छ ।
यसको प्रतिमेगावट लागत २२ करोड ४५ लाख ९४ हजार ४३७.५७ रुपैयाँ हुन आउँछ । लगानी फिर्ता हुने अवधि ९.५९ वर्ष रहेको छ र डिस्काउण्टमा लगानी फिर्ता हुने अवधि २१.९५ वर्षको हुनेछ ।
लगानीकर्ताले सी–आस्वाको माध्यमबाट आवेदन दिन सक्नेछन् । क्रेडिट रेटिङ कम्पनी केयर रेटिङ नेपालले यो आइपीओलाई औसत भन्दा तल जनाउने ‘ग्रेड ४’ रेटिङ दिएको छ ।
शिव श्रीले सिन्धुपाल्चोक जिल्लामा २२.२ मेगावटको उपर चाकु “ए” जालविद्युत आयोजना निर्माण गरिरहेको छ । यसको केन्द्रीय कार्यालय बुद्धनगर, काठमाडौंमा रहेको छ ।
वि.सं.२०७६ असोज २७ सोमवार १६:४२ मा प्रकाशित
