काठमाडौँ । लोक सेवा आयोगले नियमित बार्षिक कार्य तालिका अनुसार नै शाखा अधिकृत (राजपत्राङ्कित तृतीय श्रेणी) प्राधिक र अप्राविधिक पदहरूमा विज्ञापन गर्ने भएको छ ।
दुई वर्षदेखि अवरुद्ध हुँदै आएको कर्मचारी भर्ना प्रक्रियालाई खुलाउँदै आयोगले असोज २९(अन्तिम बुधबार) सहसचिव र उपसचिवको विज्ञापन गरे सँगै अब कार्तिक र मङ्सिर अन्तिम बुधवार शाखा अधिकृतको विज्ञापन प्रकाशन हुने भएको हो ।
आयोगको पदपूर्ति सम्बन्धी वार्षिक कार्य तालिका अनुसार प्राविधिक शाखा अधिकृत, स्वास्थ्य सेवाका आठौँ र सातौँ तहका पदहरूको कार्तिक अन्तिम बुधवार र अप्राविधिक पदहरूका लागि मङ्सिर अन्तिम बुधवार विज्ञापनरसूचना प्रकाशित हुने छ ।
सङ्घीय मामिला तथा सामान्य प्रशासन मन्त्रालयका अनुसार तिहार लगत्तै मन्त्रालयहरूसँग रिक्त रहेका दरबन्दी माग तथा छलफललाई तीव्रता दिइनेछ ।
तिहार लगत्तै माग सङ्कलनमा गरेर कुन कुन निकायमा के कति दरबन्दी आवश्यक छन् भन्ने बारे मन्त्रालयगत छलफल गरी नियमित कार्यतालिकाअनुशार नै विज्ञापन हुने गरी लोक सेवा आयोगमा पठाउँने मन्त्रालयको तयारी छ ।
स्रोतका अनुसार विभिन्न श्रेणी तथा तहका गरी झण्डै पाँच सयदेखि आठ सयको सङ्ख्यामा शाखा अधिकृतको विज्ञापन हुँदैछ ।
२०७६ कात्तिक ०५ गते प्रकाशित
वि.सं.२०७६ कात्तिक ५ मंगलवार ०८:०८ मा प्रकाशित