काठमाडौं । शिक्षा मन्त्रालयले पोखरा, मध्यपशिचमञ्चल र सुदुरपश्चिमाञ्चल विश्वविद्यालयको लागि उपकुलपति नियुक्तिका लागि योग्यता पुगेका व्यक्तिबाट आवेदन मागेको छ ।
मन्त्रालयले शनिबार सूचना जारी गरेर आवेदन मागेको हो । मन्त्रालयले यसअघि पनि प्रतिस्पर्धाबाट उपकुलपति नियुक्त गर्न भन्दै पूर्वाञ्चल, कृषि तथा वन र नेपाल संस्कृत विश्वविद्यालयका लागि आवेदन मागेको थियो ।
विवरण पेश गरेका व्यक्तिको योग्यता र क्षमताको आधारमा सम्भावित व्यक्तिको नाम उपकुलपति नियुक्तिका लागि विश्वविद्यालयका कुलपति तथा प्रधानमन्त्री केपि शर्मा ओलीलाई सिफारिस गरिने मन्त्रालयले जनाएको छ ।
तीनै वटा विश्वविद्यालयको कुलपतिको हैसियतमा प्रधानमन्त्रीले उपकुलपति नियुक्त गर्ने कानुनी व्यवस्था छ । उपकुलपति दावी गर्ने व्यक्तिले सात दिनभित्रमा विवरण पेश गर्न मन्त्रालयले अनुरोध गरेको छ।
मन्त्रालयले नेपाल संस्कृत र पूर्वाञ्चल विश्वविद्यालयको सेवा आयोगको अध्यक्ष र सदस्यमा नियुक्तिका लागि पनि व्यक्तिगत विवरण पेश गर्न आह्वान गरेको छ ।अन्नपुर्ण पोष्टमा खबर छ ।
यसरी आहवान गर्ने व्यक्तिहरुमध्येबाट आन्तरिक रोष्टर तयार भएपछि सम्भावित व्यक्तिलाई उपकुलपति तथा सेवा आयोगको अध्यक्षमा नियुक्तिका लागि सिफारिस गरिनेछ ।
२०७६ कात्तिक ०९ गते प्रकाशित
वि.सं.२०७६ कात्तिक ९ शनिवार १३:५७ मा प्रकाशित