धादिङ । धादिङको वेनिघाटरोराङ गाउँपालिका नजिकै तुनीखोलामा बोलेरो जिप दुर्घटना भएको छ । ग १ ज ३०११ नम्बरको बोलेरो आज विहान करिब ९ बजे खोलामा पल्टिँदा दश जना यात्रु घाइते भएका छन् ।
वेनिघाट रोराङको ताल्तीबाट पृथ्वीराजमार्गको मलेखु तर्फ यात्रु लिएर आउँदै गरेको सो जीप गजुरी गाउँपालिका वडा नम्बर २ तुनीखोला नजिकै दुर्घटना भएको हो । तिहार मानेर फर्किएका यात्रु लिएर गाउँबाट पृथ्वीराजमार्ग तर्फ आईरहेको उक्त जिप सडकबाट ७० मिटर तल खोलामा खसेको स्थानीयको भनाइ छ ।
घाईतेहरुको नेपाली सेना, नेपाल प्रहरी र स्थानीय उद्वारकर्मीहरुले उद्वार गरि राजमार्ग स्थित राजमार्ग सामुदायिक अस्पताल मलेखुमा उपचार भइरहेको छ । दुर्घटनाको कारण बारे प्रहरीले अनुसन्धान गरिरहेको इलाका प्रहरी कार्यालय गजुरी धादिङले जनाएको छ ।
२०७६ कार्तिक १४ गते प्रकाशित
वि.सं.२०७६ कात्तिक १४ बिहीवार ११:१७ मा प्रकाशित