काठमाडौं । एभरेष्ट बैंकको एटिएम केही घन्टाका लागि बन्द हुने भएको छ । बैंकका अनुसार एटिएम मेसिनहरु र कार्डबाट हुने कारोबार बुधबार (कात्तिक २० गते) साँझ ८ बजेदेखि बिहीबार बिहान ४ बजेसम्म बन्द हुनेछ ।
बैंकले एटिएम तथा कार्डबाट हुने सम्पूर्ण कारोबारलाई अझै विश्वसनीय बनाउनका लागि हाल सञ्चालनमा रहेको स्विच प्रणालीलाई नयाँ प्रणालीमा परिवर्तन गर्न लागिएकाले एटिएम सेवा बन्द हुने भएको हो ।
यस्तै, बैंकले अबदेखि म्याग्नेटिक स्ट्रिप प्रविधिमा आधारित कार्डहरु बन्द हुने पनि बताएको छ । सुरक्षाका हिसाबले कमजोर हुने भन्दै बैंकले म्याग्नेटिक स्ट्रिप कार्डको सट्टा अबदेखि चिप कार्ड लिन आफ्ना ग्राहकलाई आग्रह गरेको छ ।
केही समयअघि मात्रै ह्याकरहरुले विभिन्न बैंकका एटिएम ह्याक गरी करोडौं रुपैयाँ लुटेका थिए ।त्यसपछि बैंक तथा वित्तीय संस्थाहरु थप सुरक्षा सतर्कता अपनाउन लागेका हुन।
२०७६ कात्तिक २० गते प्रकाशित
वि.सं.२०७६ कात्तिक २० बुधवार १४:३७ मा प्रकाशित
