काठमाडौं । अर्थ मन्त्रालयले नेपाल धितोपत्र बोर्डको अध्यक्ष छनोट गर्नका लागि तीन सदस्यीय छनोट समिति गठन गरेको छ । मन्त्रालयले राष्ट्रिय योजना आयोगका सदस्य डा. रामकुमार फुयाँलको संयोजकत्वमा समिति गठन गरेको हो ।
समितिमा राजस्व सचिव शिशिर ढुंगाना र नेपाल चाटर्ड एकाउटेन्ट एसोसिएसनका अध्यक्ष कृष्णप्रसाद आचार्य पनि छन । छनोट समितिले आवेदन आह्वान गर्ने कार्यक्रम छ ।
समितिले इच्छुक उम्मेवारसँग अन्तर्वार्ता र प्रस्तुतिका आधारमा तीन जनाको नाम सिफारिस गर्नेछ । नामको त्यो सूचीलाई अर्थमन्त्रीले मन्त्रिपरिषद् वैठकमा लानेछन। त्यसैका आधारमा मन्त्रिपरिषद्ले एक जनालाई बोर्डको अध्यक्ष नियुक्त गर्नेछ ।
बोर्ड अध्यक्ष डा. रेवतबहादुर कार्कीको चार वर्षे कार्यकाल सकिएपछि असोज मसान्तयता बोर्डको अध्यक्ष पद खाली छ ।बोर्डको अध्यक्ष पदका लागि बोर्डकै कार्यकारी निर्देशकहरु परिष्ठनाथ पोडेल र निरज गिरी, निमित्त कार्यकारी निर्देशक नवराज अधिकारी तथा नेपाल राष्ट्र बैंकका पूर्व कार्यकारी निर्देशक भिष्मराज ढुंगानाले आकांक्षा राखेका छन ।
२०७६ कात्तिक २१ गते प्रकाशित
वि.सं.२०७६ कात्तिक २१ बिहीवार १०:२४ मा प्रकाशित