विक्रम सुनार, काठमाडौं । भारतले नेपालको सीमा मिचेर आफ्नो नक्सा जरी गरेपछि नेपालमा तरंग आएको छ । भारतले जारी गरेको नक्समा नेपालतर्फको कालापानी, लिपुलेक र लिम्पयाधुराको भुभाग मिचेर नक्सा जारी गरेको छ ।
नक्सा सार्वजनिक भएसँगै नेपालीहरु भारतविरुद्ध जागेका छन् । यही विषयलाई लिएर शनिवार प्रधानमन्त्री केपी शर्मा ओली, नेकपाका अध्यक्ष पुष्प कमल दाहाल प्रचण्ड र प्रतिपक्ष दल नपाली कांग्रेसका सभापति शेरबहादुर देउवा पनि प्रधानमन्त्री निवास बालुवाटारमा एक जुट भएका छन् ।
नक्सा जारी भएसँगै दैनिक हजारौँको संख्यामा सर्वसाधरणदेखि विद्यार्थीसम्मले भारत विरुद्ध सडक तताएका छन् । उनीहरुले भनेका छन्, ‘गो ब्याक इण्डीया । कालापानी हाम्रो हो ।’ शुक्रवार मात्र लैनचौरस्थित भारतीय दुतावास अगाडि हजारौँ संख्यामा उपस्थित नेपालीले नराबाजी गरेका थिए ।
उनीहरुको निधारमा कालो पट्टी थियो, हातमा प्लेकार्ड र अनुहारमा आक्रोस । संयुक्त विद्यार्थी आन्दोलनको ब्यानरमा निस्कीएको जुलुसले भारतको नक्सा समेत जलायो । नाकाबन्दीपछि सुतेका नेपाली जनता अहिले ब्युझिएका छन् ।
गत शुक्रबार भारतले विवादित नक्सा जारी गरे पनि छ दिनसम्म भने नेपाल सरकारले कुनै प्रतिक्रिया दिएको थिएन । परराष्ट्र मन्त्रालयले वेनामको अस्पष्ट विज्ञप्ती जारी गरेको थियो । शनिवारसम्म आइपुग्दा भने नेपालले यस विषयमा धारणा बनाइसकेको छ ।
प्रधानमन्त्री ओली, प्रचण्ड र शेरबहादुर देउवासहित बालुवाटारमा बसेको सर्वपक्षीय बैठकपछि भनेका छन्, ‘लिपुलेक हाम्रो हो । भारतले जारी गरेको नक्सा नेपाललाई स्वीकार्य हुँदैन ।’ नेपालको यो निस्कर्ष अब भारतको लागि टाउको दुखाइको विषय बन्नेछ ।
सर्वपक्षीइ बैठकले स्पष्ट रुपमा भनेको छ की यस विषयमा तत्काल भारतसँग सम्बाद गर्नेछौँ । उनीहरुले कडा रुपमा परराष्टलाई भनेका छन्, ‘विज्ञप्ती निकालेर मात्र हुँदैन, सम्बाद गरेर निस्कर्ष निकाल्नुपर्छ ।’ नाकाबन्दीपछि नेपालले भारतलाई दिएको यो अर्को कडा झड्का हो ।
भारतले भने आफ्नो नक्सामा कुनै समस्या नभएको बताइसकेको छ । तर, अब नेपालसँगको सम्बादमा भारतले लाज पचाउ छ की नाक जोगाउछ हेर्न बाँकी छ ।
२०७६ कात्तिक २३ गते प्रकाशित
वि.सं.२०७६ कात्तिक २३ शनिवार २०:३६ मा प्रकाशित