काठमाडौं । एभरेष्ट बैंकले तीन महिनामै ६९ करोड ८ लाख रुपैयाँ नाफा आर्जन गरेको छ । बैंकले गत आर्थिक वर्षको पहिलो त्रैमासिक अवधिको तुलनामा यस वर्ष ९.०८ प्रतिशतले नाफा बढाएको हो ।
बैंकको व्याज आम्दानीभन्दा ब्याज खर्च धेरै हुँदा खुद व्याज आम्दानीमा असर पारेको छ । व्याज आम्दानी १६ प्रतिशतले बढ्दा व्याज खर्च भने २२ प्रतिशतले बढेको छ । खुद व्याज आम्दानी ९ प्रतिशतले बढेर एक अर्ब ४३ करोड रुपैयाँ आर्जन गरेको छ ।
निक्षेप संकलन र कर्जा लगानीलाई सन्तुलन कायम गरेको छ । चालु आर्थिक वर्षको तीन महिनामा १२.४१ प्रतिशतले निक्षेप सुधार हुँदा कर्जा लगानी १२.८१ प्रतिशतले बढाएको हो ।
तीन महिनाको अवधिमा एक खर्ब ३४ अर्ब रुपैयाँ निक्षेप संकलन गरि एक खर्ब ९ अर्ब रुपैयाँ कर्जा लगानी गरेको छ । पूँजीकोष अनुपात १३.२८ प्रतिशतबाट बढेर १३.७९ प्रतिशत पुगेको छ ।
खराब कर्जा थप सुधार गर्दै ०.२१ प्रतिशतबाट झारेर ०.१७ प्रतिशत कायम गरेको हो । आधार व्याजदर थोरैले घटाएर ८.५२ प्रतिशत कायम गरेको छ ।
बैंकको स्प्रेडदर भने अस्वभाविक रुपमा बढेको छ। नेपाल राष्ट्र बैंकको पछिल्लो निर्दे्शिका अनुसार गणना गर्दा बढेको वित्तीय विवरणमा उल्लेख छ ।
गत वर्ष ४.२३ प्रतिशत रहेको स्प्रेडदर एक प्रतिशतभन्दा माथिको विन्दुले बढेर ५.२५ प्रतिशत छ । प्रतिशेयर आम्दानी तीन रुपैयाँले बढेर ३४ रुपैयाँ पुगेको छ ।
२०७६ कात्तिक २८ गते प्रकाशित
वि.सं.२०७६ कात्तिक २८ बिहीवार १४:०३ मा प्रकाशित
