काठमाडौं । हिमालयन बैंकले गत वर्षको भन्दा ६.८६ प्रतिशतले नाफा सुधार गरेको छ । बैंकले तीन महिनाको अवधिमा ६९ करोड ४२ लाख रुपैयाँ नाफा गरेको छ । गत वर्ष ६४ करोड ९६ लाख रुपैयाँ नाफा गरेको थियो ।
खुद व्याज आम्दानीमा भने खासै सुधार हुन सकेन । यस्तो आम्दानी एक अर्ब ३१ करोड रुपैयाँ छ। व्याज खर्चको तुलनामा व्याज आम्दानी बढ्न नसक्दा बैंकको खुद व्याज आम्दानी सुधार हुन नसकेको हो ।
तीन महिनाको अवधिमा निक्षेप संकलन र कर्जा विस्तारमा सन्तुलन कायम गरेको छ । असार यता एक खर्ब १५ अर्ब रुपैयाँ निक्षेप संकलन गरी ९७ अर्ब ७० करोड रुपैया ऋण लगानी गरेको छ ।
गत वर्ष एक खर्ब ९ अर्ब निक्षेप संकलन गरी ९२ अर्ब ६९ करोड रुपैयाँ कर्जा विस्तार गरेको हो । चुक्ता पुँजी ८ अर्ब ५२ करोड रुपैयाँ रहेको बैंकको जगेडा कोषमा ५ अर्ब ७९ करोड रुपैयाँ छ ।
पुँजीकोष अनुपात थप बढेर १४.०८ प्रतिशत पुगेको छ । खराव कर्जामा सुधार गर्दै १.१६ प्रतिशतमा झारेको छ । प्रतिशेयर आम्दानी ३२ रुपैयाँ छ ।
२०७६ कात्तिक २९ गते प्रकाशित
वि.सं.२०७६ कात्तिक २९ शुक्रवार १२:०३ मा प्रकाशित
