२०७६ मंसिर ०६ गते प्रकाशित
काठमाडौं । नागरिक लगानीकोषले शुक्रवार चालू आर्थिक वर्षको पहिलो त्रैमासको वित्तीय विवरण सार्वजनिक गरेको छ ।
पूँजीबजारमा बजार निर्माताको रुपमा आउन लागेको कोषकोे पहिलो त्रैमासको वित्तीय विवरण अनुसार विभिन्न कम्पनीहरुको शेयरमा रू. ९ अर्ब ८ करोड १० लाख लगानीमा रहेको छ ।
यो रकम गत वर्षको पहिलो त्रैमासमा रू. ४ अर्ब ७५ करोड ११ लाख थियो । गत वर्षभन्दा यस वर्ष धितोपत्रमा लगानी ९१ प्रतिशतले बढाएको हो ।
बजार निर्माताको रुपमा काम गर्न सहायक कम्पनी दर्ता गर्ने प्रक्रियामा रहेको कोषको चालू सम्पत्ति रू. १३ अर्ब ९४ करोड ५४ लाख रहेको छ भने चालू दायित्व रू. १७ अर्ब ५२ करोड रहेको छ । चालू सम्पति गत वर्षभन्दा यस वर्ष २९ दशमलव ५६ प्रतिशतले र चालू दायित्व करीब २ प्रतिशतले घटेको हो ।
यस वर्षको पहिलो त्रैमासमा कोषले रू. १२ करोड ११ लाख खुद नाफा गरेको छ । यो नाफा गत वर्षको यसै अवधिमा रू. १० करोड ५७ लाख रहेको थियो । खुद नाफा गत वर्षभन्दा १४ दशमलव ५७ प्रतिशत बढी भएको हो ।
आर्थिक वर्ष २०७४/७५ को सञ्चित मुनाफाबाट २२ प्रतिशत बोनस शेयर वितरण गरी कोषले रू. १ अर्ब १० करोड २३ लाख चुक्तापूँजी पु¥याएको छ । जगेडा कोष रकममा यस वर्ष ८४ दशमलव ६० प्रतिशत बृद्धि देखिएको छ । कम्पनीको जगेडा कोषमा पहिलो त्रैमाससम्म रू. ४ अर्ब ६७ करोड ८८ लाख रकम रहेको उल्लेख छ ।
कोषको उपयोग गर्दै रू. १ खर्ब ३० अर्ब ९९ करोड ९ लाख लगानी गरेको छ । गत वर्ष यसै अवधिमा यो रकम रू. १ अर्ब १० अर्ब ८९ करोड ७ लाख थियो । नेपाल सरकारको ऋणपत्रमा कोषले चालू आवको पहिलो त्रैमासमा रू. ६० करोड लगानी गरेको छ । गत वर्ष ऋणपत्रमा रू. १ अर्ब ८० करोड ९३ लाखको लगानी थियो । यस वर्ष यो रकम घटेको छ ।
कोषमा सहभागीहरुलाई सापटी र आवास कर्जा बापत यस वर्षको पहिलो त्रैमासमा रू. २५ अर्ब ९८ करोड २९ लाख प्रवाह गरेको छ । गत वर्षभन्दा यो रकम यस वर्ष बढेको छ । गत वर्ष पहिलो त्रैमासमा कोषले रू. २० अर्ब ३ करोड २५ लाख यो शिर्षकमा कर्जा प्रवाह गरेको थियो । बैंक मौज्दातमा रू. ९२ करोड ९८ लाख रहेको छ ।
प्रतिशेयर आम्दानी रू. ४४ रहेको कोषको प्रतिशेयर नेटवर्थ रू. २१२ रहेको छ । रिटर्न वन इन्भेष्टमेण्ट भने ९ दशमलव ३७ रहेको कोषको वित्तीय विवरणमा उल्लेख छ ।
वि.सं.२०७६ मंसिर ६ शुक्रवार १३:११ मा प्रकाशित