काठमाडौँ । सरकारले २० सह–सचिवको दरबन्दी थप गरेको छ । गृह मन्त्रालयको प्रस्ताव स्वीकृत गरेसँगै सरकारले दरबन्दी थप गर्ने भएको हो ।
गृह मन्त्रालयले सामान्य प्रशासन मन्त्रालयमार्फत प्रस्ताव पेस गरेको थियो । मङ्सिर ३ गते बसेको मन्त्रिपरिषद्को बैठकबाट सो प्रस्ताव स्वीकृत भएसँगै सह–सचिवको दरबन्दी थपिन लागेको हो ।
प्रस्ताव स्वीकृत भएसँगै अब १९ पहाडी जिल्लामा सह–सचिवले प्रमुख जिल्ला अधिकारीको नेतृत्व गर्नेछन् । सह–सचिव तहका कर्मचारी सिडिओ रहने जिल्ला पाँचथर, भोजपुर, खोटाङ, संखुवासभा, ओखलढुङ्गा, रामेछाप, दोलखा, लमजुङ, पर्वत, अर्घाखाँची, प्युठान, सल्यान, डोल्पा, बैतडी, जुम्ला, दैलेख, अछाम र डडेल्धुरा छन । हाल ती जिल्लाहरुमा उप–सचिबले प्रमुख जिल्ला अधिकारीको नेतृत्व गर्दै आएका छन।
यस अघि प्रमुख जिल्ला अधिकारीको नेतृत्व ४२ जिल्लामा सह–सचिव र ३५ जिल्लामा उप–सचिवले गर्दै आएका छन् ।
गृहका अनुसार दुई निर्वाचन क्षेत्र भएको जिल्लामा प्रमुख जिल्ला अधिकारीको लागि सह–सचिव खटाउने प्रस्ताव पेस गरिएको हो ।
सहसचिव खटाइने जिल्लामा प्रहरीको नेतृत्वको लागि प्रहरी उपरीक्षक (एसपी) खटाइने गृह स्रोतले जनाएको छ । तर एसपीको लागि पनि दरबन्दी थप गर्ने तयारी रहेको छ । हालका लागि भने रहेकै जनशक्तिबाट एसपी खटाइनेछन।
हाल ४० जिल्लामा एसपी, ३५ जिल्लामा प्रहरी नायव उपरीक्षक र दुई जिल्लामा प्रहरी वरिष्ठ उपरीक्षक खटाइँदै आएको छ । नयाँ तयारी १६ जिल्लामा मात्रै प्रहरी नायव उपरीक्षक खटाइने छन् । नेपाल प्रहरीमा यस अघि तीन हजार पाँच सय १६ दरबन्दी थप भएको थियो ।
२०७६ मंसिर १० गते प्रकाशित
वि.सं.२०७६ मंसिर १० मंगलवार ०८:१० मा प्रकाशित
