काठमाडौं । सेयर बजारमा बुधबार चमक देखिएको छ । नेप्से सूचकमा लामो समयपछि ८.३० अंकको वृद्धि देखिएको हो । धितोपत्र बोर्डले पुँजी बजार सुधारका काम द्रुृत गतिमा अघि बढिरहेको विज्ञप्ति सार्वजनिक गरेपछि लगानीकर्तामा केही आत्मबल बढेको देखिन्छ ।
सरकार, अर्थ मन्त्रालय, धितोपत्र बोर्ड लगायत नियामक निकायहरुको गतिविधिले सेयर बजारलाई प्रत्यक्ष प्रभाव पार्ने गर्छ ।
विगतमा पनि अर्थमन्त्रीको बोलीकै भरमा पनि सेयर बजारमा उतारचढाव आउने गरेको थियो ।
बुधबारको बजार वृद्धिलाई धितोपत्र बोर्डको सकारात्मक विज्ञप्तिसँग पनि कतिपयले जोडेर हेरेका छन् । यद्दपि, यस वृद्धिको दिगोपनका लागि भने केही दिनको कारोबार हेर्न धैर्य गर्नुपर्ने हुन्छ ।
सूचकमा चमक आए पनि कारोबार रकम अझै सुस्त छ । ११०२ विन्दुमा पुगेपछि नेप्से फर्किएको हो । बजार बढ्ने आशामा लामो समयदेखि बसिरहेका लगानीकर्तालाई यसले केही राहत दिएको छ ।
नेप्से सूचक बुधबार ८.३० अंकले बढेर १११७.४६ विन्दुमा आइपुगेको छ । १६५ कम्पनीको २१ करोड २३ लाख रुपैयाँभन्दा बढीको कारोबार भएको छ ।
७ लाख ३८ हजार ४४६ कित्ता सेयर खरिदबिक्री भएका छन् । कारोबार भएकामा व्यपारिकबाहेक बाँकी सबै समूहका सूचक बढेका छन् । वाणिज्य बैंक समूह ४.९३ अंकले माथि लागेको छ ।
कारोबार रकममा एनएमबि बैंकले अग्रता लिएको छ । यसको २ करोड ७५ लाख रुपैयाँभन्दा बढीको कारोबार भएको छ । रिडी हाइड्रोपावरका लगानीकर्ताले १०५ का दरले कमाएका छन् । यसको मूल्य बढेर सर्किट ब्रेकर लागेको हो । साल्ट ट्रेडिङका लगानीकर्ताले सबैभन्दा धेरै ६.९२५ का दरले गुमाएका छन् ।
२०७६ मंसिर ११ गते प्रकाशित
वि.सं.२०७६ मंसिर ११ बुधवार १५:४२ मा प्रकाशित