काठमाडौं । सबैको लघुवित्त वित्तीय संस्थाले शनिबार मंसिर २१ गते तेस्रो वार्षिक साधारण सभा बोलाएको छ । सभामा कम्पनीले १३ प्रतिशत बोनस वितरण गर्ने विशेष प्रस्ताव पेश गर्दैछ ।
यसैगरी, कर तिर्न थप ११ लाख २८ हजार ९ सय ४७ रुपैयाँ ३७ पैसा नगद पनि दिनेछ । सभा मस्र्याङ्दी रिभर भ्यू रिसोर्ट, बन्दीपुर ५, तनहुँमा बिहान ११ बजे सुरु हुनेछ ।
बोनसपछि कायम हुने पुँजीबाट १०० प्रतिशत हकप्रद ल्याउने अर्को विशेष प्रस्ताव पनि छ । हाल यस कम्पनीको चुक्ता पुँजी १६ करोड ५० लाख रुपैयाँ रहेको छ ।
बोनस वितरणपछि पुँजी १८ कराड ६४ लाख ५० हजार रुपैयाँ पुग्नेछ । कम्पनीले यही पुँजीबाट १८ लाख ६४ हजार ५०० कित्ता (१००%) हकप्रद ल्याउन लागेको हो ।
सभामा कम्पनीले अन्य कुनै वित्तीय संस्थाहरु गाभ्न र गाभिन परेमा त्यसको सम्पूर्ण अख्तियारी सञ्चालक समितिलाई दिने प्रस्ताव पनि लैजानेछ ।
आर्थिक वर्ष २०७५/७६ को वासलात, नाफा–नोक्सान र नगद प्रवाहमाथि छलफल हुनेछ । आर्थिक वर्ष २०७६/७७ को लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेन्डा पनि राखिएको छ ।
सभा प्रयोजनका लागि कम्पनीले मंसिर ५ गते बुक क्लोज गरेको छ । मंसिर ४ गतेसम्म कायम रहेका सेयरधनीले लाभांश पाउनेछन् । यस लघुवित्तले गत साउनमा आइपीओ जारी गरेको थियो ।
२०७६ मंसिर २० गते प्रकाशित
वि.सं.२०७६ मंसिर २० शुक्रवार १०:४५ मा प्रकाशित