काठमाडौं । १३औँ सागमा पदक विजेता खेलाडीहरुलाई प्रधानमन्त्री केपी शर्मा ओलीले सरकारी निवास बालुवाटारमा बोलाएर बधाई दिनुहुनेभएको छ ।
बुधबार दिउँसो २ बजे बालुवाटारस्थित ठूलो हलमा नेपालका पदक विजेता खेलाडीहरुलाई प्रधानमन्त्रीले बधाई दिने कार्यक्रम तय भएको प्रेस सल्लाहकार सूर्य थापाले जानकारी दिनुभयो ।
नेपाली खेलाडीहरुले हालसम्मकै उत्कृष्ट प्रदर्शन गर्दै कीर्तिमानी ५१ वटा स्वर्ण पदक जितेलगत्तै प्रधानमन्त्रीले मंगलबारै भिडियो सन्देशमार्फत् बधाई दिइसक्नुभएको छ ।
आज बालुवाटरमा हुने कार्यक्रममा प्रधानमन्त्रीले पदक विजेता खेलाडीहरुलाई सरकारको तर्फबाट पुरस्कार पनि घोषणा गर्ने सल्लाहकार थापाले जानकारी दिनुभयो ।
’प्रधानमन्त्रीले सबैल खेलाडीहरुलाई बालुवाटारमै भेटेर बधाई दिनुहुनेभएको छ’, थापाले भन्नुभयो, ’त्यसक्रममा खेलाडीहरुका लागि आवश्यक सहयोग र पुरस्कार राशिको पनि घोषणाा हुनेछ ।’
एपेन्डिसाइटिस भएर मंसिर १० गतेदेखि अस्पताल भर्ना हुनुभएका प्रधानमन्त्रीले सागको उद्घाटनमा विशेष सम्बोधन गर्न पाउनुभएको थिएन् ।
एपेन्डिसाइटिसको अपरेशनपछि १० आराम गर्नुपरेकाले मंगलबार भएको समापनमा दशरथ रंगशाला जान नपाउनुभएका प्रमले पदक विजेता खेलाडी, प्रशिक्षक र खेलसंस्थाका पदाधिकारीलाई भेटेर बधाई दिनुहनेभएको हो ।
नेपालले घरेलु भूमिमा भएको १३औँ सागमा कीर्तिमानी ५१ स्वर्ण, ६० रजत र ९५ कास्य पदक जित्दै भारतपछि दोस्रो स्थानमा रहेको थियो । नेपालले यसअघि सन् १९९९ मा घरेलु भूमिमै भएको सागमा ३१ स्वर्ण जितेको थियो ।
२०७६ मंसिर २५ गते प्रकाशित
वि.सं.२०७६ मंसिर २५ बुधवार १२:२९ मा प्रकाशित