काठमाडौं । नेपाल बैंकको वार्षिक साधारणसभा पुस २५ गते हुने भएको छ । बैंक सञ्चालक समिति अध्यक्ष वासुदेव अधिकारीले राष्ट्र बैंकबाट लाभांश स्वीकृत भएकाले साधारणसभा टुंगो लगाइएको बताए ।
बैंकले करिब दुई दशकपछि शेयरधनीलाई लाभांश बाँड्दैछ । बैंकले चालु आर्थिक वर्षमा २५ प्रतिशत लाभांश दिने प्रस्ताव गरेको छ । आर्थिक वर्ष २०७५/७६ को वित्तीय विवरणअनुसार वितरणयोग्य नाफाबाट लाभांश दिने भएको हो ।
बैंकका शेयरधनीले १५ प्रतिशत बोनस शेयर र १० प्रतिशत नगद लाभांश पाउने छन् । घोषित लाभांश राष्ट्र बैंकबाट स्वीकृत भइसकेको छ । अब साधारण सभाबाट पारित भएपछि शेयरधनीले लाभांश पाउने छन् ।
लामो समयदेखि खराब ऋणका कारण थलिएको बैंकले दुई दशकभन्दा बढी समयदेखि लाभांश दिन सकेको थिएन ।विगतको वर्षदेखि नै बैंक नाफामा रहेको भए पनि सञ्चित नोक्सानीका कारण उसलाई लाभांश वितरण गर्न केन्द्रीय बैंकले रोक लगाएको थियो ।
उक्त नोक्सानी पूर्ति गरेसँगै बैंक लाभांश वितरण गर्न योग्य भएको हो । हाल बैंकको चुक्ता पुँजी नौ अर्ब ८१ करोड रूपैयाँ छ । उसले यही चुक्ता पुँजीको २५ प्रतिशत लाभांश बाँड्ने प्रस्ताव गरेको हो ।
गत वर्ष बैंकले दुई अर्ब ६१ करोड रुपैयाँ नाफा गरेको थियो । अघिल्लो वर्ष सोही अवधिमा बैंकले तीन अर्ब २१ करोड नाफा गरेको थियो । हाल बैंकको प्रति शेयर आम्दानी २७ रूपैंयाँ १५ पैसा छ ।
२०७६ पुस ०२ गते प्रकाशित
वि.सं.२०७६ पुस २ बुधवार १३:५६ मा प्रकाशित