काठमाडौ । इसाई धर्मावलम्बीहरुको महान पर्व क्रिसमसको अवसरमा स्वदेश तथा विदेशमा रहेका इसाई धर्मावलम्बीहरुमा प्रधानमन्त्री केपी शर्मा ओलीले शुभकामना दिनुभएको छ ।
नेपाल बहुधार्मिक, बहुजातीय, बहुभाषिक र बहुसांस्कृतिक विशेषतायुक्त देश हो भन्दै प्रधानमन्त्री ओलीले यस्ता विशेषताहरु मौलिक पूँजीको रुपमा रहेको बताउनुभएको छ ।
‘एकता र सहिष्णुताको यस पूँजीलाई हामीले समृद्ध देश निर्माणमा सदुपयोग गर्नु पर्दछ । विभिन्न धर्म र संस्कृतिमा आधारित यस्ता पर्वहरु हाम्रो राष्ट्रिय एकता, पारस्परिक सद्भाव र सहिष्णुताका मौलिक पहिचान हुन् ।’ प्रधानमन्त्री ओलीको सचिवालयद्धारा जारी विज्ञप्तीमा उल्लेख छ ।
नेपालको संविधानले धार्मिक स्वतन्त्रता र भाषा तथा संस्कृति सम्बन्धी विषयलाई मौलिक हकको रुपमा सुनिश्चित गरेको छ भन्दै प्रधानमन्त्री ओलीले विभिन्न समुदायका धार्मिक तथा सांस्कृतिक आस्थालाई सम्मान गर्दै यहाँ विभिन्न भाषा, लिपि, संस्कृति, सभ्यता र सांस्कृतिक सम्पदाको संरक्षण हुँदै आएको बताउनुभएको छ ।
‘लोकतन्त्र, समाजिक न्याय, राष्ट्रिय एकता, स्वाधीनता, राष्ट्रिय अखण्डता र देशभक्तिलाई केन्द्रमा राख्दै अनुशरण गरिने अक्षुण्ण एकता, सद्भाव र सहिष्णुता हाम्रो राष्ट्रिय विशेषता हो ।
यस विशेषतालाई आत्मसात गर्दै हामी समृद्ध नेपाल र सुखी नेपालीको राष्ट्रिय आकाङ्क्षा पूरा गर्ने अभियानमा छौं ।’ विज्ञप्तीमा भनिएको छ ।
२०७६ पुस ०९ गते प्रकाशित
वि.सं.२०७६ पुस ९ बुधवार ०९:५२ मा प्रकाशित