काठमाडौं । रिलायन्स लाइफ इन्स्योरेन्स कम्पनीले ६३ करोड रूपैंयाँको प्राथमिक शेयर निस्कासन गर्ने भएको छ । इक्रा नेपालले गरेको रेटिङअनुसार कम्पनीले मध्यम किसिमको सुरक्षा जनाउने ‘इक्रा एनपी आइपीओ ग्रेड चार’ प्राप्त गरेको छ ।
कम्पनीले प्रति शेयर सय रूपैंयाँको दरमा ६३ लाख कित्ता सर्वसाधारणको लागि निस्कासन गर्ने छ । यसमा केही प्रतिशत कर्मचारी र ५ प्रतिशत सामुहिक लगानी कोषका लागि सुनिश्चित गरिएको हुन्छ ।
कम्पनीले गत आर्थिक वर्षको साधारणसभाबाट प्राथमिक शेयर निस्कासन गर्ने प्रस्ताव पारित गरेको थियो। कम्पनीको प्रमुख शेयरधनी सिद्धार्थ बैंकको मात्रै १८ प्रतिशत स्वामित्व छ । यसले गर्दा बैंकको एकजना प्रतिनिधि कम्पनीको सञ्चालक हुने व्यवस्था छ ।
त्यस्तै संस्थागत लगानीकर्ताका रूपमा अग्नि होल्डिङ, एमसी ग्रुप, केडिया अर्गनाइजेसन, रिलयान्स ग्रुप र शिवशक्ति ग्रुप लगायतका समुह छन । बीमा कम्पनीहरूले उच्च बैंक ब्याजदरको फाइदा उठाइरहेका छन्। यसले गर्दा हरेक वर्ष नाफामा सुधार गर्न सफल भएका हुन ।
हाल जीवन बीमा कम्पनी १९ वटा छन । अघिल्लो वर्ष १० वटा कम्पनीले सञ्चालन अनुमति पाएका थिए। नयाँ कम्पनीमध्ये रिलायन्सको बजार हिस्सा ७ प्रतिशतमात्रै छ । समग्र जीवन बीमा क्षेत्रमा कम्पनीको बजार हिस्सा जम्मा एक प्रतिशत मात्रै छ।
स्थापना भएको दुई वर्षको अवधिमा कम्पनीले ८८ वटा शाखा सञ्जाल विस्तार गरेको छ। यसै अवधिमा कम्पनीले ९ हजार २ सय अभिकर्ता तयार गरिसकेको छ। संस्थापक समुह बलियो भएकाले कम्पनीले राम्रो प्रस्तुति दिने एजेन्सीले जनाएको छ।
गत आर्थिक वर्ष ६२ करोड ८० लाख रूपैंयाँ बीमा शुल्क आर्जन गरेको कम्पनीले चालु आर्थिक वर्षको तीन महिनामा भने १८ करोड १० लाख रूपैंयाँ आर्जन गरेको छ।
रेटिङ गरेसँगै कम्पनीले नेपाल धितोपत्र बोर्डबाट अनुमति लिनु पर्नेछ। बोर्डबाट अनुमति पाएर सर्वसाधारणको लागि शेयर निस्कासन लगभग चैत भित्रमा हुने देखिन्छ ।
२०७६ पुस ११ गते प्रकाशित
वि.सं.२०७६ पुस ११ शुक्रवार १२:०६ मा प्रकाशित
