काठमाडौं । नेपाल धितोपत्र बोर्डको अध्यक्षका लागि तीन उम्मेदवार सिफारिस भएका छन । सोमबार भएको योग्यता र प्रस्तुतिकरण पछि ५ जनाबाट तीनजना छनौट गरि सिफारिसका लागि अर्थमन्त्रालयमा पठाएको छनौट समितिका संयोजक रामकुमार फुँयालले जानकारी दिए ।
छनौट समितिले भिष्मराज ढुङगाना, केशव श्रेष्ठ र निरज गिरीलाई बोर्डको अध्यक्षको लागि सिफारिस गरेको हो । ढुंगाना नेपाल राष्ट्र बैंकको कार्यकारी निर्देशकबाट अवकाश पाएपछि अर्थमन्त्रीको सिफारिसमा बोर्डको सदस्यका रुपमा मनोनित भएका थिए। गिरी बोर्डकै कार्यकारी निर्देशक हुन् भने केशव श्रेष्ठ पुर्वाधार विज्ञ हुन् ।
छनौट समितिले आवेदन दिएका ८ जनामध्येबाट पहिलो चरणमा ५ जनालाई सटलिस्ट गरेको थियो। उनीहरुको योग्यता, अन्तर्वाता र प्रस्तुतिको आधारमा सोमबार समितिले तीन जनाको नाम अर्थमन्त्रालयलाई सिफारिस गरेको हो ।
गत असोज ४ मा अध्यक्ष रेवतबहादुर कार्की सेवा अवधिका आधारमा अवकास पाएपछि बोर्डको अध्यक्ष पद खालि थियो ।सरकारले २० कात्तिकमा राष्ट्रिय योजना आयोगका सदस्य फुँयालको संयोजकत्वमा तीन सदस्यीय छानविन समिति गठन गरि छनौट प्रकृया अघि बढेको थियो।
छनौट समितिले सिफारिस गरेको तीन जनामध्ये मन्त्रीपरिषद्को निर्णयको आधारमा एक जना बोर्डको अध्यक्षमा सिफारिस हुनेछन् । अध्यक्षको सेवा अवधि ४ वर्षको हुन्छ ।
२०७६ पुस १५ गते प्रकाशित
वि.सं.२०७६ पुस १५ मंगलवार ११:५४ मा प्रकाशित