२०७६ पुुस १८ गते प्रकाशित
काठमाडौं । पोखरा फाइनान्स लिमिटेडको २३ औं वार्षिक साधारण सभा शुक्रवार पोखरामा सम्पन्न भएको छ ।
सभाले आर्थिक वर्ष २०७५/ ७६ सम्मको सञ्चित मुनाफा तथा जगेडा कोषबाट प्रतिशेयर ७ प्रतिशतका दरले बोनस शेयर र प्रतिशेयर ७ दशमलव २० प्रतिशतका दरले नगद लाभांश गरी कुल १४ दशमलव २० प्रतिशत लाभांश वितरण गर्ने प्रस्ताव सर्वसम्मतिले पारित गरेको छ ।
बोनस शेयर वितरण पछि कम्पनीको चुक्तापूँजी रू. ९१ दशमलव ७२ करोड पुग्ने छ । सोही सभाले सर्वसाधारण शेयरधनीसमुहबाट प्रेम बहादुर थापा, डा दिपेन्द्र कुमार गौतम र श्री कृष्ण बहादुर गुरुङलाई आगामी चार वर्षको लागि सञ्चालक समितिमा निर्विरोध निर्वाचित गरेको छ ।
यसैगरी सभाले आव २०७६/ ७७को लेखापरीक्षक नियुक्त गर्नुका साथै पोखरा फाइनान्स लिमिटेड र अन्य उपयुक्त बैंक तथा वित्तीय संस्थाहरु एक आपसमा गाभ्ने/ गाभिने(मर्जर) वा प्राप्ति (एक्विजिसन) गर्ने विषयमा आवश्यक सहमति र सम्झौता गर्न लगायत प्रचलित नियम, कानूनअनुसार वित्तीय संस्थाको तर्फबाट गर्ने सम्पूर्ण कार्यगर्न सञ्चालक समितिलाई अख्तियारी प्रदान गर्ने निर्णय गरेको कम्पनीका प्रमुख कार्यकारी अधिकृत रविचन्द्र गुरुङले बताए ।
आगामी दिनमा आधुनिक प्रविधियुक्त बैकिङ सेवा तथा सुविधामा विशेष ध्यान दिदैं ग्राहक सेवालाई निरन्तर रुपमा चुस्त दुरुस्त र सुरक्षित बनाउँदै लैजाने योजना रहेको पनि कम्पनीले बताएको छ ।
वि.सं.२०७६ पुस १८ शुक्रवार १६:४२ मा प्रकाशित