२०७६ पुस २० गते प्रकाशित
काठमाडौं । एनएमबी म्युचुअल फन्ड अन्तर्गत सञ्चालित एनएमबी हाइब्रिडफन्ड एल–१ ले सूचीकृत शेयरमध्ये वाणिज्य बैंकहरूको शेयरमा सबैभन्दा बढी लगानी गरेको छ ।
फन्डले मंसिर मसान्तसम्म सूचीकृत शेयरमा रू. ४० करोड ११ लाख ८६ हजार लगानीमध्ये वाणिज्य बैंकहरूको १७ कम्पनीको शेयरमा रू. १५ करोड ९० लाख २० हजार लगानी गरेको छ । कम्पनीले ५७ सूचीकृत कम्पनीको शेयरमा लगानी गरेको छ ।
कात्तिक मसान्तसम्मको तुलनामा मंसिर मसान्तमा फन्डले गरेको धितोपत्र तथा अन्य लगानी मूल्यमा उल्लेख्य वृद्धि देखिएको छ ।
कात्तिक मसान्तसम्म सूचीकृत शेयर, ऋणपत्र तथा बन्ड, सार्वजनिक निष्कासन, हकप्रद शेयर, बोनस शेयर र मुद्दती निक्षेपमा गरी कुल रू. ६९ करोड ७७ लाख ७६ हजार रहेको लगानीमूल्य मंसिर मसान्तसम्म आइपुग्दा रू. ८१ करोड ६७ लाख २१ हजार पुगेको हो । यस फन्डले मुद्दती निक्षेपमा रू. १० करोड लगानी गरेको छ ।
मंसिर मसान्तसम्मको लगानीको कुल लागत मूल्य रू. ५२ करोड ८२ लाख ३५ हजार रहेको छ । लागत मूल्यभन्दा फन्डको लगानी मूल्य बढी रहेको छ ।
कात्तिकमा रू. ९ दशमलव ८७ रहेको प्रतिएकाइ खुद मूल्य मंसिर मसान्तसम्म रू. १० दशमलव ११ कायम भएको छ । यो योजनाले मंसिर मसान्तमा रू. ५७ लाख ९५ हजार नाफा आर्जन गरेको छ ।
कात्तिकसम्म रू. ५८ लाख ८४ हजार नोक्सानीमा रहेको यस योजनाले कात्तिकमा रू. १ करोड ४३ लाख ६० हजार आम्दानी गरेसँगै नाफा आर्जन गर्न सफलता मिलेको हो ।
वि.सं.२०७६ पुस २० आइतवार १०:१४ मा प्रकाशित