बागलुङ । सोमवार सम्पन्न छैटौं बागलुङ महोत्सवमा करीब १० करोड रुपैयाँको कारोबार भएको छ । उद्योग वाणिज्य संघ बागलुङको आयोजनामा भएको महोत्सव पुस ११ गते शुरू भएको थियो ।
बागलुङको कला, संस्कृति, पर्यटन र व्यापार व्यवसायलाई प्रवर्द्धन गर्न आयोजित महोत्सवमा १० करोड रुपैयाँभन्दा बढीको कारोबार भएको संघका महासचिव नरेश कँडेलले जानकारी दिए । कति मुनाफा भयो र कति खर्च भन्ने हिसाब चाँडै सार्वजनिक गरिने उनले बताए ।
कँडेलका अनुसार महोत्सवमा करीब रू. ४० लाख जतिको टिकट विक्री भएको छ । महोत्सव सफल भएकोले अर्कोपटक महोत्सव आयोजना गर्न हौसला प्राप्त भएको उनले थपे ।
महोत्सवमा राखिएका जिल्लाका पर्यटकीय स्थलको जानकारीका साथै होमस्टेका परिकार र कृषि प्रदर्शनीले जिल्लाबारे जानकारी गराउन सफल भएको उनको भनाइ छ ।
महोत्सवमा प्याराग्लाइडिङ, पुरुष भलिबल प्रतियोगिता, दोहोरी गीत प्रतियोगिता, खुला लोकनृत्य प्रतियोगिता, तारो हान्ने खेल लगायत गरिएको थियो ।
महोत्सवको आम्दानीबाट आर्थिक पत्रकारिता पुरस्कार स्थापना र बागलुङ बजारभित्रका सीसी टिभी क्यामेरा मर्मत गर्ने तयारी उद्योग वाणिज्य संघले गरको छ ।
२०७६ पुस २३ गते प्रकाशित
वि.सं.२०७६ पुस २३ बुधवार ११:२१ मा प्रकाशित