काठमाडौं । आरएमडीसी लघुवित्त वित्तीय संस्थाको २१ औं वार्षिक साधारण सभा बुधवार काठमाडौंमा सम्पन्न भएको छ ।
उक्त सभाले संचालक समितिका अध्यक्ष सुजाता जोशीले प्रस्तुत गरेको आव २०७५/०७६ को संचालक समितिको वार्षिक प्रतिवेदन, वासलात, नाफा नोक्सान तथा नगद प्रवाह विवरण स्वीकृत गरेको छ ।
सभामा कम्पनीले आर्थिक वर्ष २०७५र ०७६ मा संचालन नाफा रू. ४८ करोड २५ लाख आर्जन गरेको जानकारी दिइएको थियो । साधारण सभाले संचालक समितिद्वारा शेयरधनीहरुको लागि प्रस्तावित १२ दशमलव ५ प्रतिशत नगद लाभांश तथा १२ दशमलव ५ प्रतिशत बोनस शेयर दिने प्रस्ताव पनि पारित गरेको छ ।
नेपालमा लघुवित्त कार्यक्रम संचालन गर्ने संस्थाहरुलाई थोक ऋण प्रदान गर्ने उद्देश्यका साथ विसं २०५५ कार्तिक १३ गतेबाट उक्त कम्पनीको स्थापना भएको हो ।
नेपाल राष्ट्र बैंकबाट “घ” वर्गको वित्तीय संस्थाको इजाजत प्राप्त कम्पनीको अधिकृतपूँजी रू.१ अर्ब रहेको छ भने जारी तथा चुक्तापूँजी रू.७९ करोड ९३ लाख रहेको छ ।
सभामा पहाडी तथा हिमाली क्षेत्रमा बस्ने गरीब तथा विपन्न वर्गको लागि लघुवित्त कार्यक्रम अझ विस्तार गर्ने र साझेदार संस्थाहरुको क्षमता अभिवृद्धि गर्ने कार्यलाई निरन्तरता दिने लक्ष्य रहेको अध्यक्ष जोशीले बताइन् ।
साथै उनले कृषि, पशुपंक्षी पालन र क्लिन इनर्जी क्षेत्रको प्रवर्द्धन तथा विकास गर्न साझेदार संस्थाहरुलाई सहुलियत ब्याज दरमा कर्जा उपलब्ध गराउने समेत बताइन् ।
२०७६ पुस २३ गते प्रकाशित
वि.सं.२०७६ पुस २३ बुधवार १५:११ मा प्रकाशित