काठमाडौं । काठमाडौंको नागर्जुन १ नर्सरी चोकमा भएको बम विस्फोटको जिम्मा विप्लव समूह ‘विप्लव समूह’ नेपाल कम्युनिष्ट पार्टीले लिएको छ । बुधबार राती ८ बजे गराइएको शक्तिशाली बम विस्फोटको जिम्मा लिँदै घटनास्थलमा छरिएको पर्चा भेटिएको छ ।
बालुवाटार ललिता निवास जग्गा प्रकरणमा मुछिएका डा. शोभाकान्त ढकालको घरमा विस्फोट गराइएको थियो । विस्फोटबाट ढकालको घरको अघिल्लो भागमा क्षेती भएको छ भने निजी सवारीमा समेत क्षति पुगेको छ । घटनामा के कति क्षेति भयो भन्नेकुरा सार्वजनिक भएको छैन ।
घटनास्थल नेपाली सेनाको मेडिकल कलेजकै छेउमा पर्छ । घटनास्थलमा तत्काल नेपाली सेना र नेपाल प्रहरी पुगेर अनुसन्धान शुरु गरेका थिए । विस्फोटको समयमा ढकालको परिवारका सदस्य घर भित्रै थिए । ढकाल भने घरमा थिएनन् ।
घटनास्थलमा छरिएको पर्चामा बालुवाटारस्थित ललिता निवास परिसरको जग्गा व्यक्तीको नाममा दर्ता र बेच्ने प्रपञ्चको मुख्य योजनाकार भएकोले सेवोटेज गरिएको उल्लेख गरिएको छ ।
२०७६ माघ १ गते प्रकाशित
वि.सं.२०७६ माघ १ बुधवार २१:२१ मा प्रकाशित
