काठमाडौं । तीन कम्पनीले शेयरधनीको बैंक खातामा नगद लाभांश जम्मा गर्ने भएका छन् । एनएमबि बैंक, लुम्बिनी विकास बैंक तथा महुली सामुदायिक लघुवित्त वित्तीय संस्थाले शेयरधनीको बैंक खातामा नगद लाभांश जम्मा गर्ने भएका हुन् ।
एनएमबि बैंकले पुस २४ गते सम्पन्न २४औं वार्षिक साधरण सभाबाट पारित १४ प्रतिशत (कर समेत)नगद लाभांश शेयरधनीको हितग्राही खातामा उपलब्ध बैंक खातामा माघ २ गते (आज)देखि जम्मा गर्ने भएको छ ।
हालसम्म पनि भौतिक रुपमा नै शेयर प्रमाणपत्र र शेयर अभौतिकीकरण नगराएका शेयरधनीले शेयर अभौतिकीकरण गराई हितग्राही खातामा बैंक खाता अद्यावधिक गराएपछि नगद लाभांश जम्मा गर्ने बैंकले उल्लेख गरेको छ । बैंकको शेयर रजिष्ट्रार एनएमबि क्यापिटल लिमिटेड रहेको छ ।
लुम्बिनी विकास बैंकले १५ प्रतिशत नगद लाभांश (कर सहित)शेयरधनीको बैंक खातामा माघ १ गतेदेखि जम्मा गरिदिएको छ । बैंकको पुस २९ गते सम्पन्न १२औं वार्षिक साधारण सभाले उक्त लाभांश पारित गरेको थियो । बैंकले हितग्राही खातामा बैंक खाता अद्यावधिक गराएका शेयरधनीको बैंक खातामा सो लाभांश जम्मा गरेको हो ।
हितग्राही खातमा बैंक खाता नं अद्यावधिक नगराएका शेयरधनीहरुलाई बैंक खाता अद्यावधिक गराइ शेयर अभौतिकीकरण गर्न समेत बैंकले अनुरोध गरेको छ । साथै, लाभांश जम्मा गर्दा सम्बन्धित बैंक तथा वित्तिय संस्थाको नियमअनुसार कुनै शुल्क लाग्ने भएमा सो शुल्क शेयरधनीले नै बेहोर्नु पर्नेछ । बैंकको शेयर रजिष्ट्रार मुक्तिनाथ क्यापिटल लिमिटेड रहेको छ ।
महुली सामुदायिक लघुवित्त वित्तीय संस्था लिमिटेडले माघ २ गते (आज)देखि नगद लाभांश जम्मा गर्ने भएको छ । कम्पनीले हितग्राही खातामा बैंक खाता अद्यावधिक गराएका शेयरधनीहरुको बैंक खातामा आईपीएसमार्फत उक्त लाभांश जम्मा गर्न लागेको हो ।
कम्पनीको पुस २६ गते सम्पन्न ७ औं वार्षिक साधारण सभाले ११ दशमलव ५७९ प्रतिशत (कर समेत) नगद लाभांश वितरण गर्ने प्रस्ताव पारित गरेको थियो ।कम्पनीको शेयर रजिष्ट्रार सनराइज क्यापिटल लिमिटेड रहेको छ ।
२०७६ माघ ०२ गते प्रकाशित
वि.सं.२०७६ माघ २ बिहीवार ०९:४९ मा प्रकाशित