काठमाडौं । साबिकका २८ वाणिज्य बैंकमध्ये गत आर्थिक वर्षको साधारणसभा २४ ओटाले मात्र गरेका छन । यी बैंकले साधारणसभाबाट पारित बोनस शेयर तथा नगद लाभांश वितरण गर्न पनि शुरू गरेका छन।
हालसम्म लाभांश वितरण गर्ने वाणिज्य बैंकमध्ये एनएमबि बैंकले सबैभन्दा बढी लाभांश वितरण गरेको छ । त्यस्तै हालसम्म सेन्चुरी कमर्शियल बैंकले भने शेयरधनीलाई लाभांश वितरण गर्ने प्रस्ताव गरेको छैन ।
एनएमबि बैंकले चूक्तापूँजीबाट १४ प्रतिशत नगद लाभांश र २१ प्रतिशत बोनस शेयर गरी जम्मा ३५ प्रशिशत लाभांश वितरण गर्ने प्रस्ताव पारित गरी शेयरधनीको बैंक खातामा नगद लाभांश जम्मा गर्न थालेको छ ।
त्यस्तै वाणिज्य बैंकमध्ये सबैभन्दा बढी लाभांश वितरण गर्नेमा दोस्रो नबिल बैंक रहेको छ । यो बैंकले पनि शेयरधनीलाई चूक्तापूँजीको ३४ प्रतिशत लाभांश वितरण गरेको छ ।
बैंकको पुस २२ गते सम्पन्न ३५औं साधारणसभाले १२ प्रतिशत नगद लाभांश र २२ प्रतिशत बोनस शेयर वितरण गर्ने प्रस्ताव पारित गरेको हो ।
बैंकले शेयरधनीको बैंक खातामा नगद लाभांश जम्मा गर्न थालिसकेको छ । यो तथ्यांक माघ ३ गतेसम्मको हो । यो वर्ष साधारणसभा गर्न ४ ओटा वाणिज्य बैंक बाँकी छन् । ४ यी बैंकमध्ये एनसीसी बैंकले माघ १७ गते साधारणसभा बोलाएको छ भने राष्ट्रिय वाणिज्य बैंकले पनि माघ २४ गते साधारणसभा बोलाएको छ ।
त्यस्तै, यो वर्ष हिमालयन बैंकले लाभांश वितरण गर्ने प्रस्ताव मात्र गरेको छ । हिमालयन बैंक सञ्चालक समितिको गत कात्तिक २८ गते बसेको ३७७औं बैठकले १२ प्रतिशत नगद लाभांश र १० प्रतिशत बोनस शेयर दिने प्रस्ताव गरेको हो ।
गत वर्ष ४ दशमलव ५ प्रतिशत नगद लाभांश र २ प्रतिशत बोनस शेयर वितरण गरेको सेन्चुरी कमर्शियलले हालसम्म पनि लाभांश वितरण गर्ने प्रस्ताव गरेको छैन । बैंकले गत वर्षको वार्षिक साधारणसभा २०७६ वैशाख १२ गते गरेको थियो ।
कम्पनी ऐन २०६३ अनुसार पब्लिक कम्पनीले कारोबार शुरू गर्ने इजाजत पाएको १ वर्ष्भित्र प्रथम वार्षिक साधारणसभा गर्नुपर्नेछ र त्यसपश्चात् प्रत्येक वर्ष कम्पनीको आर्थिक वर्ष पूरा भएको ६ महीनाभित्र वार्षिक साधारणसभा गर्नुपर्ने प्रावधान छ ।
कुनै पब्लिक कम्पनीले तोकिएको म्याद सकिएको ३ महीनाभित्र पनि साधारणसभा नबोलाएमा कम्पनी रजिस्ट्रारको कार्यालयले साधारणसभा बोलाउन निर्देशन दिनसक्ने व्यवस्था छ ।
यो वर्ष एनएमबि बैंक, नबिल बैंक र कृषि विकास बैंकले ३० प्रतिशतभन्दा बढी लाभांश वितरण गरेका छन् । २० प्रतिशतभन्दा बढी लाभांश नेपाल बैंक, एभरेस्ट बैंक, हिमालयन बैंक, एनआईसी एशिया बैंक, सानिमा बैंक, ग्लोबल आईएमई बैंक र स्ट्यान्डर्ड चाटर्ड बैंकले वितरण गरेका छन् ।
यी बैंकमध्ये हिमालयन बैंकले हालसम्म प्रस्ताव मात्र गरेको छ भने अन्य ६ ओटा बैंकले लाभांश वितरण शुरू गरिसकेका छन् ।
जनता बैंक र ग्लोबल आइएमई बैंक मर्ज भई एकीकृत कारोबार शुरू गरेपश्चात् हाल वाणिज्य बैंकको संख्या २७ छ । मर्जरपश्चात् जनता र ग्लोबलले गत मंसिर २० गतेदेखि ग्लोबल आईएमई बैंकको नामबाट एकीकृत कारोबार शुरू गरेका हुन् ।
२०७६ माघ ०५ गते प्रकाशित
वि.सं.२०७६ माघ ५ आइतवार ०९:२१ मा प्रकाशित