काठमाडौं । हालैमात्र चीनमा देखिएको कोरोना भाइरसको सङ्क्रमणका कारण नेपाली बजारमा लसुनको मूल्य ह्वातै बढेको छ ।
कालीमाटी फलफूल तथा तरकारी विकास समितिले दिएको जानकारीअनुसार चीनमा कोरोना भाइरस देखा परेसँगै नेपालमा लसुनको मूल्य वृद्धि भएको हो ।
बाह्रखरीसँग कुरा गर्दै कालीमाटी फलफूल तथा तरकारी बजार विकास समितिका वरिष्ठ बजार व्यवस्थापन अधिकृत मनोज धितालले नेपाल लसुनमा चीनसँगै र्निभर छ । भारतबाट थोरै मात्रामा आउँछ, जसले गर्दा चीनसँग जोडिएका सबै नाका बन्द भएसँगै लसुनको मूल्य वृद्धि भएको बताए ।
समितिका अनुसार कालीमाटीमा माघ १ गते लसुनको खुद्रा मूल्य प्रतिकिलो २८५ रुपैयाँ रहेको थियो भने त्यसयता क्रमशः मूल्य वृद्धि हुँदै सोमाबार लसुनको मूल्य प्रतिकिलो ५५५ रुपैयाँ पुगेको छ ।
समितिका अनुसार एक गतेको तुलनामा सुकेको लसुनको अधिकतम खुद्रा मूल्य किलोमा १२६ दशमलब ५५ प्रतिशत वृद्धि भएको छ ।
त्यसैगरी, कालीमाटीमा आज लसुनको अधिकतम थोक मूल्य प्रतिकिलो ४४९ रुपैयाँ रहेको छ । धितालका अनुसार माघ १५ देखि कालीमाटीमा तीन टनको हाराहारीमा मात्र लसुन आयात भएको छ ।
कालीमाटी तरकारी बजारको होलसेल बजारमा लसुनको अभाव भए पनि खुद्रा पसलमा लसुन स्टक राखिने भएकाले अभाव नहुने धितालले बताए । “होलसेल बजारमा लसुन अभाव भएको हो, खुद्रा बजारमा लसुन स्टक छ अभाव हुँदैन,” उनले भने ।
वि.सं.२०७६ माघ २० सोमवार १६:२७ मा प्रकाशित
