काठमाडौं । नेपाल इन्फ्रास्ट्रक्चर बैंक लिमिटेडले सर्वसाधारणहरुका लागि निष्काशन गर्ने साधारण शेयरर धितोपत्र प्रत्याभुतिको लागि नागरिक लगानी कोषलाई प्रत्याभुतिकर्तामा नियुक्त गरेको छ ।
८ अर्ब बराबरको रू. १०० अंकित दरको ८ करोड कित्ता शेयर विक्री गर्ने प्रत्याभुति सम्बन्धी सम्झौता–पत्रमा नागरिक लगानी कोषको तर्फबाट कार्यकारी निर्देशक रमण नेपाल र नेपाल इन्फ्रास्ट्रक्चर बैंकको तर्फबाट नायव प्रमुख कार्यकारी अधिकृत भुपेन्द्र पाण्डेले मंगलवार हस्ताक्षर गरेका छन् ।
नेपाल सरकारको समेत लगानी रहेको उक्त बैंक नेपालकै पहिलो पूर्वाधार विकास बैंक हो भने बैंकले जारी गर्न लागेको यो सार्वजनिक निष्कासन हाल सम्मकै देशकै ठूलो आईपीओ हुनेछ ।
उक्त बैंकको अधिकृतपूँजी रू.४० अर्ब, जारीपूँजी रू.२० अर्ब र चुक्तापूँजी रू.१२ अर्ब रहेको छ भने सर्वसाधारणहरुलाई शेयर निष्काशन गरी बाँडफाँट गरेपछि चुक्तापूँजी रू.२० अर्ब हुनेछ ।
उक्त बैंक लिमिटेडले विसं २०७५ माघ २८ गते नेपाल राष्ट्र बैंकबाट राष्ट्रिय स्तरको पूर्वाधार विकास बैंकको रुपमा कार्य गर्न स्वीकृति प्राप्त गरीे विसं फागुन २२ गतेदेखि बैंकिङ्ग कारोबार शुरुवात ग रेको थियो ।
जलविद्युत, सौर्य उर्जा, होटल, रिसोर्ट, फनपार्क, केवलकार, शिक्षा, स्वास्थ्य लगायतका पूर्वाधार क्षेत्रका परियोजनाहरुमा श्रोत लगानी गर्ने मूल उद्देश्य लिइ स्थापना भएको उक्त बैंकले मुलुकभित्र तथा मुलुक बाहिरबाट दीर्घकालिन श्रोत संकलन गरी त्यस्ता परियोजनाहरुलाई आवश्यक पर्ने श्रोत उपलब्ध गराउने लक्ष्य लिएको छ ।
वि.सं.२०७६ माघ २१ मंगलवार १६:१४ मा प्रकाशित
