काठमाडौं । दुई वित्तीय संस्थाले एक आपसमा गाभिनका लागि सम्झौता गरेका छन । तनहूँमा प्रधान कार्यालय रहेको सारथी लघुवित्त वित्तीय संस्था र काभ्रेपलाञ्चोकको धुलिखेलमा प्रधान कार्यालय रहेको नयाँ नेपाल लघुवित्त वित्तीय संस्थाबीच मर्जर हुने सम्भौता भएको हो ।
एक आपसमा गाभ्नरगाभिन सहमति गरी मंगलबार सारथी लघुवित्तका अध्यक्ष कमल प्रसाद ज्ञवाली र नयाँ नेपालका अध्यक्ष डा.पुरुपोत्तम श्रेष्ठले सम्झौता पत्रमा हस्ताक्षर गरेका हुन ।
नेपाल राष्ट्र बैंकको मर्जर नीतिलाई सहयोग पुग्ने लक्ष्यका साथ सारथी नेपाल लघुवित्त वित्तीय संस्थाको नामबाट दुवै संस्था एकिकृत कारोवार गर्ने भएका छन । सम्झौताअनुसार शेयर स्वाप अनुपात १ः१ रहने छ ।
मर्जरपछिको सञ्चालक समितिको अध्यक्षता नयाँ नेपालको तर्फबाट हुने बताइएको छ । यससँगै दुवै तर्फबाट ३/३ जना गरी ६ सदस्यीय सञ्चालक समिति रहने छन । व्यवस्थापनको नेतृत्व सारथी लघुवित्त वित्तीय संस्थाका प्रबन्ध निर्देशकले गर्ने सहमति भएको छ ।
हाल सारथी लघुवित्त वित्तीय संस्थाको चुक्ता पूँजी ११ करोड ४ लाख २५ हजार छ भने नयाँ नेपालको चुक्ता पूँजी १० करोड ८ लाख रुपैया रहेको छ ।
चालू आवको दोश्रो त्रैमासिक वित्तीय विवरणअनुसार दुवै संस्थाको जोड्दा कुल कर्जा लगानी रकम २ अर्ब ४० करोड ५५ लाख, बचत रकम ५४ करोड १९ लाख र खुद नाफा ३ करोड २८ लाख ९६ हजार रहेको छ ।
वि.सं.२०७६ माघ २२ बुधवार १५:५९ मा प्रकाशित