काठमाडौैं । सूर्योदय लघुवित्त वित्तीय संस्था लिमिटेड र त्रिलोक लघुवित्त वित्तीय संस्था लिमिटेडले फागुन १० गतेबाट एकीकृत कारोबार शुरु गर्ने भएका छन् ।
स्याङजा जिल्ला पुतलीबजार नगरपालिका १ मा मुख्य कार्यालय रहेको सूर्योदय लघुवित्त वित्तीय संस्था लिमिटेड र नवलपरासी जिल्ला सुनवल नगरपालिका –४ मा मुख्य कार्यालय रहेको त्रिलोक लघुवित्त वित्तीय संस्था लिमिटेडले संयुक्तरुपमा वित्तीय कारोबार गर्न लागेका हुन् ।
गत असार १९ गते सूर्योदय लघुवित्तका अध्यक्ष अनन्तकुमार श्रेष्ठ र त्रिलोक लघुवित्तका अध्यक्ष लेखनाथ खनियाले सहमतिपत्रमा हस्ताक्षर गरेका थिए ।
ती दुवै कम्पनीले गत पुस ५ गते सम्पन्न साधारण सभाले एक आपसमा गाभिने निर्णय स्वीकृत गरेका थिए । उक्त दुवै कम्पनीलाई नेपाल राष्ट्र बैंकले माघ ८ गते एकीकृत कारोबार गर्न स्वीकृती दिइसकेको छ ।
साथै कम्पनी रजिष्ट्रारको कार्यालयले गाभिने संस्था त्रिलोक लघुवित्त वित्तीय संस्थाको सम्पूर्ण सम्पति तथा दायित्व गाभ्ने संस्था सूर्योदय लघुवित्त वित्तीय संस्थाले सकार्ने तथा बेहोर्ने गरी स्वीकृति दिएको छ ।
दुवै कम्पनी गाभिएपछि संस्थाको नाम सूर्योदय लघुवित्त वित्तीय संस्था लिमिटेड हुनेछ भने कम्पनीको केन्द्रीय कार्यालय साविकको सूर्योदय लघुवित्तको केन्द्रीय कार्यालय पुतलीबजार नगरपालिका -१,स्याङजामा रहने छ ।
वि.सं.२०७६ फागुन ४ आइतवार ०७:१० मा प्रकाशित