काठमाडौं । आईएमई लिमिटेडका अध्यक्ष चन्द्रप्रसाद ढकाल महत्वपूर्ण व्यवसायिक व्यक्ति (सीआइपी) सम्मानबाट सम्मानित हुनुभएको छ।
मंगलबार काठमाण्डौको राष्ट्रिय सभागृहमा आयोजित एक कार्यक्रममा प्रधानमन्त्री केपी शर्मा ओलीले ढकाललाई उक्त सम्मान प्रदान गर्नुभएको हो ।
बैंकिङ्ग प्रणालीमार्फत रेमिटेन्सको कारोबार गरी सबैभन्दा बढी वैदेशिक मुद्रा भित्र्याएर देशको अर्थतन्त्रमा वाणिज्य क्षेत्रको योगदान बढाउन महत्वपूर्ण भूमिका निर्वाह गरेकोले व्यापार तथा निकासी प्रवर्द्धन केन्द्र, उद्योग, वाणिज्य तथा आपूर्ति मन्त्रालयले उहाँलाई उक्त सम्मान प्रदान गरेको हो । ढकाल यस अघि सन् २०१४ मा पनि यो सम्मानबाट सम्मानित हुनुभएको थियो ।
नेपाल उद्योग वाणिज्य महासंघका उपाध्यक्षसमेत रहनुभएका ढकालको बैंक, वित्त तथा अन्य सेवामूलक क्षेत्रमा लगानी रहेको छ । केन्द्रले ढकाललगायत विभिन्न २५ जना व्यक्तित्वहरुलाई यो सम्मान प्रदान गरेको छ ।
वि.सं.२०७६ माघ २८ मंगलवार १९:५८ मा प्रकाशित