काठमाडौं । गण्डकी प्रदेश सरकार स्थापना भएको २ वर्ष पूरा हुँदैछ । प्रदेशका मुख्यमन्त्री पृथ्वीसुब्बा गुरुङले २०७४ फागुन ४ गते सपथ ग्रहणपश्चात प्रदेश सरकार गठन भएको थियो ।
प्रदेशका आर्थिक मामिला तथा योजनामन्त्री किरण गुरुङले गण्डकी प्रदेश सरकारका दुई वर्षका उपलब्धि भनेर शुक्रबार ३० वटा बुँदा सार्वजनिक गरेका छन ।
मन्त्रालयमा पत्रकार सम्मेलनमार्फत सार्वजनिक गरिएको बुँदामा अघिल्लो आर्थिक वर्षमा निर्णय भएको प्रदेशको राजधानी र नाम तोक्न सफल भएको विषय एक नम्बरमा राखेको छ ।
प्रदेश सभाले २०७५ असार १८ गते प्रदेशको राजधानी पोखरा तोकेको थियो भने सोही वर्ष असार २२ गते प्रदेशको नाम गण्डकी राखेको थियो ।
उपलब्धिको दोस्रो बुँदामा प्रदेशले दुई वर्षको अवधिमा ३२ वटा कानुन बनाएको, ६ वटा नियमावली र २ वटा गठन आदेश स्वीकृत भएको उल्लेख छ ।
उपलब्धिको दसौं बुँदामा प्रदेशले खानी तथा खनिज, पर्वतारोहण, विद्युत, वन र जलस्रोत बापत २८ करोड ५८ लाख ८९ हजार रोयल्टी प्राप्त गरेको उल्लेख छ ।
उपलब्धिका अन्तिम बुँदामा भने नवलपुरको धौबादीमा फलाम कम्पनी सञ्चालन गर्न प्रदेशलाई ३ प्रतिशत शेयर बापत १२ करोड लगानी गरेको र संघीय सरकारलाई गण्डकी प्रदेशको शेयर १५ प्रतिशत र्पुयाएर ६० करोड शेयर लगानीका लागि नेपाल सरकारलाई अनुरोध गरेको उल्लेख छ ।
३० बुँदे उपलब्धिको सूचि हर्नका लागि यहाँ क्लिक गर्नुहोस्
वि.सं.२०७६ फागुन २ शुक्रवार १८:३५ मा प्रकाशित
