काठमाडौं । ओमस्टोन एसिया क्यापिटल नेपाल प्रा. लि (ओएसीएनपिएल) ले धुलिखेलमा सुविधा सम्पन्न पाँचतारे होटल तथा रिसोर्ट स्थापना गर्न वित्तीय व्यवस्थापन भएको छ ।
दुसित थानी हिमालयन रिसोर्ट एन्ड स्पा स्थापनाका लगानीका लागि सहवित्तीयकरण अन्तर्गत सानिमा बैंकको अगुवाइमा राष्ट्रिय वाणिज्य बैंक सहभागी ऋण सम्झौता सम्पन्न भएको छ ।
सो परियोजना निर्माणको अनुमानित लागत एक अर्ब २७ करोड रुपैयाँ रहेको छ । ओएसीएनपिएलले दुसित थानी हिमालयन रिसोर्ट तथा भिल्ला व्यवस्थापन र सञ्चालनको लागि दुसित इन्टरनेसनलसँग सहकार्य गर्नेछ । दुसित इन्टरनेसनल थाइल्यान्डको प्रख्यात हस्पिटालिटी तथा शैक्षिक क्षेत्रसँग सम्बन्धित ब्रान्ड हो ।
विगत ६५ वर्षदेखि हस्पिटालिटी क्षेत्रमा विश्वस्तरीय सेवा दिँदै आइरहेको दुसित इन्टरनेसनलको हाल १८ वटा देशमा २९ वटा होटल तथा रिसोर्ट सञ्चालनमा रहेको जनाइएको छ ।
अस्ट्रेलिया, नेपाल, भुटान, चीन, इन्डोनेसिया, केन्या, म्यानमार, ओमन, फिलिपिन्स, कतार, साउदी अरब, सिंगापुर, टर्की र युएई जस्ता देशमा ५२ वटा प्रोजेक्ट निर्माणको योजनामा रहेको जनाइएको छ ।
वि.सं.२०७६ फागुन ८ बिहीवार १६:५४ मा प्रकाशित