काठमाडौं । शिखर इन्स्योरेन्स कम्पनी लिमिटेडको हकप्रद शेयर चैत १३ गतेदेखि विक्रीमा आउने भएको छ । कम्पनीले ३१ लाख ७१ हजार ९३२ कित्ता हकप्रद शेयर निष्कासन गर्न लागेको हो ।
कम्पनीले नेपाल धितोपत्र बोर्डबाट माघ १४ गते अनुमति पाएसँगै चुक्तापूँजीको ३० प्रतिशत हकप्रद निष्कासन गर्ने भएको हो । कम्पनीले फागुन १२ गतेसम्मका कायम शेयरधनीका लागि १० बराबर ३ को अनुपातमा हकप्रद विक्री गर्न लागेको हो । कम्पनीको हकप्रदमा २०७७ साल वैशाख ३ गतेसम्म आवेदन दिन सकिन्छ ।
कम्पनीको हकप्रदमा एनआईबिएल एस क्यापिटलका शाखा कार्यालयहरु, शिखर इन्स्योरेन्सका शाखा कार्यालयहरु तथा आस्बा सदस्य सेवा लिएका सम्पूर्ण बैंक तथा वित्तिय संस्थाबाट पनि अनलाइन आवेदन दिन सकिन्छ । कम्पनीको विक्री प्रबन्धकमा एनआईबिएल एस क्यापिटल लिमिटेड रहेको छ ।
कम्पनीले निष्कासन गर्न लागेको हकप्रदलाई इक्रा नेपालले इक्रा एनपि आईपीओ ग्रेड ३ प्लस रेटिङ प्रदान गरेको छ । यसले कम्पनीको वित्तीय आधारभूत अवस्था औसत छ भन्ने बुझाउँछ ।
कम्पनीको हाल चुक्तापूँजी रू. १ अर्ब ५ करोड ७३ लाख १० हजार ६०० रहेको छ । हकप्रद बाँडफाँट पछि पूँजी रू. १ अर्ब ३७ करोड ४५ लाख ३ हजार ८०० पुग्नेछ ।
वि.सं.२०७६ फागुन २२ बिहीवार ०९:४० मा प्रकाशित
