वीरगन्ज । युवा वर्गको लागि गर्नुपर्ने सामाजिक उत्तरदायित्वअन्तर्गत राष्ट्रिय वाणिज्य बैंकको तेस्रो चरणको कार्यक्रम प्रदेश २ का लागि सुरुवात गरेको छ ।
फाइनान्सियल ट्रेनिङ सेन्टरका रूपमा अगाडि लैजाने उद्देश्यले सुरु गरिएको यस एकेडेमीबाट युवावर्गलगायत सबैले लाभ लिन सक्नेछन् । एकेडेमीले २१ बाट ३० फागुनसम्म निःशुल्क आवेदन दिन सक्नेगरी वित्तीय क्षेत्रमा रोजगारी पाउन तीनदिने टेक्निकल, बिहेबिरल र प्राक्टिकल बैंकिङ विषयगत तयारी कक्षा आगामी ७ देखि ९ चैतसम्म वीरगन्जमा सञ्चालन गर्दै छ ।
प्रदेश २ अन्तर्गत स्नातक र स्नाकोत्तर डिग्री भएका कलेजका विद्यार्थीलाई लक्षित गरी आवेदन आह्वान गरिएको छ । वित्तीय क्षेत्रमा आफ्नो करियर बनाउन चाहने युवा विद्यार्थीले यसबाट भरपुर लाभ लिन सक्ने बंैकले जनाएको छ ।
कार्यक्रममा उपस्थित सबैलाई राष्ट्रिय वाणिज्य बैंक, प्रदेश २ का प्रमुख विश्व प्रकाश ज्ञवालीले स्वागत गरी युवा लक्षित ट्रेनिङ आफ्नो प्रदेशमा पनि गर्न लागेकोमा खुसी व्यक्त गरे ।
कार्यक्रममा बैंकका नायब प्रमुख कार्यकारी अधिकृत कविराजले ५५ वर्षको गर्भिलो इतिहास बोकेको सरकारी बैंकको नाताले युवा वर्गको वृति विकासका लागि र समाजलाई केही योगदान दिने उद्देश्यले हाम्रो सामाजिक उत्तरदायित्व निर्वाह गर्दै यो तालिम सञ्चालन गरिएको बताए ।
वित्तीय क्षेत्रमा आफ्नो करियर बनाउन ठूलै शिक्षित जमात लालायित भइरहेको परिप्रेक्षमा, रोजगारोन्मुख यस्ता किसिमका तालिमले युवकको वृत्ति विकासमा सहयोग गर्नेमा उनले जोड दिए ।
आवेदकमध्ये निश्चित क्राइटेरियाको आधारमा ५० जनालाई छानेर बैंकले उक्त तालिममा सहभागी गराई पेड इन्टर्न्सिपमा निश्चत अवधिको लागि राख्नेछ ।
सम्भवतः नेपालमै पहिलोपटक बैंकले निःशुल्क रूपमा आयोजना गरेको युवा लक्षित यस्तो किसिमको रोजगारी उन्मुख तालिम निकट भविष्यमै बाँकी प्रदेशमा पनि सञ्चालन गरिने र प्रदेश १ र ३ मा सम्पन्न भई तालिम लिएका हाल बैंकमा इन्टर्नका रूपमा आबद्ध हुने पनि विज्ञप्तिमा उल्लेख छ ।
वि.सं.२०७६ फागुन २२ बिहीवार १२:०७ मा प्रकाशित