जापान । विश्व शेयर बजार रक्ताम्मे बनेको छ । साउदी अरब र रुसबीच मूल्य युद्ध छेडिएको आशंकमा लगानीकर्ताहरु त्रस्त बनेपछि सोमवार एशियादेखि यूरोपसम्म सारा बजार रातोमा आएको हो ।
सोमवार जापान बाहिर एशिया प्रशान्त क्षेत्रको एमएससीआई बृहत शेयर परिसचूचक ४ दशमलव ४ प्रतिशतले घटेको थियो । सूचकमा आएको यो कमी सन् २०१५ को अगष्टयताकै खराब हो । उक्त दिन बजार बन्द हुँदा जापानमा निक्केई २२५ परिसूचक ५ दशमलव शून्य ७ प्रतिशतले घटेर १९ हजार ६९८ दशमलव ७६ अंकमा आएको थियो ।
अष्ट्रेलियामा पनि एएसएक्स २०० ७ दशमलव ३३ प्रतिशतले घटी ५ हजार ७६० दशमलव ६ अंकमा आएको थियो । सूचकमा आएको योसन् २००८ यताकै तीव्र दैनिक कमी हो ।
चीनमा साङहाई कम्पोजिट ३ दशमलव शून्य १ प्रतिशतले घट्दै २ हजार ९४३ दशमलव २९ अंकमा आउँदा हङकङमा हाङशेङ ४ दशमलव २३ प्रतिशतको कमीसहित २५ हजार ४० दशमलव ४६ अंकमा ओर्लियो ।
दक्षिण कोरियामा पनि कोस्पी परिसूचक ४ दशमलव १९ अंकले घटेर १ हजार ९ सय ५४ दशमलव ७७ अंकमा आइपुगेको थियो । सोमबार सिंगापुर, थाइल्याण्ड, ताइवान, भारतलगायत अन्य प्रमुख बजारमा पनि उच्च कमी आएको थियो ।
यो समाचार तयार पार्दाखेरि नेपाली समयअनुसार साँझ ४ः४५ बजेतिर यूरोपमा पनि बजार रातोमै थियो । बेलायतमा फुट्सी ५ दशमलव ८२ प्रतिशतले घटी ६ हजार ८६ दशमलव १८ अंकमा आएको थियो ।
फ्रान्समा पनि क्याक ४० ६ दशमलव ५० प्रतिशतले घट्दै ४ हजार ८०५ दशमलव २३ अंकमा झरेको थियो । जर्मनीमा पनि डीएएक्स ६ दशमलव ४५ प्रतिशतले घटेर १० हजार ७९७ दशमलव १६ अंकमा ओर्लिएको थियो ।
इटालीमा सरकारले देशको उत्तरमा ठूलो क्षेत्र बन्द गर्ने आदेश दिएपछि त्यहाँका अधिकां शेयर बजार खुल्न सकेनन् । फुट्सी एमआईबी ९ दशमलव ७ प्रतिशतले घटेको थियो । यूरोपका अन्य बजार पनि रातोमा थियो ।
पछिल्लो समय शेयर बजारमा हड्बडी देखिएको छ । लगानीकर्ताहरुले साउदी अरब र रुसले के गर्लान् भन्ने नाप्न नसकेर यस्तो दरमा शेयर बेचिरहेका सेभेन इन्भेष्टमेन्ट म्यानेजमेन्टका सह–संस्थापक जष्टिन उर्कहर्ट–स्टिवर्ट बताउँछन् । एजेन्सी
वि.सं.२०७६ फागुन २६ सोमवार १८:०७ मा प्रकाशित
