काठमाडौं । धितोपत्र बजारमा माघसम्म उत्कृष्ट बजार पूँजीकरण हुने दश कम्पनीमध्ये ८ कम्पनी वाणिज्य बैंक रहेका छन् ।
नेपाल स्टक एक्सचेन्ज (नेप्से) ले उपलब्ध गराएको माघसम्मको विवरणअनुसार उत्कृष्ट आठमा पर्ने वाणिज्य बैंकहरूमा नबिल, एनएमबि , स्ट्यान्डर्ड चार्टर्ड, हिमालयन, एनआईसी एशिया, ग्लोबल, एभरेस्ट र नेपाल इन्भेस्टमेन्ट बैंक रहेका छन् ।
नेप्सेको वेबसाइटलाई आधार मान्ने हो भने हाल २५५ कम्पनी सूचीकृत रहेका छन् । यीमध्ये उत्कृष्ट पूँजीकरण हुने दश कम्पनीमध्ये पहिलो नम्बरमा नेपाल दूरसञ्चार कम्पनी लिमिटेड रहेको छ ।
१५ करोड कित्ता शेयर सूचीकृत गराएको यस कम्पनीको माघको अन्त्यसम्म बजार पूँजीकरण रू. ९२ अर्ब ८५ करोड कायम थियो । यो रकम फागुनको पछिल्लो कारोबार २२ गतेसम्म रू. ९८ अर्ब ७० करोड कायम भएको छ ।
बजारमा घट्नेबढ्ने क्रम चलिरहे पनि नेपाल दूरसञ्चार कम्पनीको बजार पूँजीकरण भने माघको तुलनामा बढेको छ । नेपाल दूरसञ्चार कम्पनीको मात्र हैन माघसम्म सर्वाधिक बजार पूँजीकरण भएका अन्य नौ कम्पनीको बजार पूँजीकरण पनि फागुन २२ गतेसम्म बढेकै देखिन्छ ।
सर्वाधिक बजार पूँजीकरण हुने दश कम्पनीहरूमध्ये नेपाल लाइफ इन्स्योरेन्स पनि एक हो । यो कम्पनीको सूचीकृत शेयर अन्य जीवन बीमा कम्पनीको तुलनामा बढी भएकोले पूँजीकरणमा बलियो बन्न सकेको हो ।
नेपाल लाइफले धितोपत्र दोस्रो बजारमा ५ करोड ४९ लाख ६१ हजार ६०८ कित्ता शेयर सूचीकृत गराएको छ । बजार पूँजीकरण कम्पनीको सूचीकृत शेयर र बजार मूल्यको आधारमा निकालिन्छ ।
सूचीकृत कम्पनीको शेयरको कुल बजार मूल्य नै त्यस कम्पनीको बजार पूँजीकरण हो।(आर्थिक अभियानबाट)
वि.सं.२०७६ फागुन २७ मंगलवार १६:२२ मा प्रकाशित
