काठमाडौं । विगत लामो समयदेखि दोश्रो बजारमा सेयर कारोबार अवधि कम भएकोले समय थप्नुपर्ने लगानीकर्ताहरुको मागको सम्बोधन हुने भएको छ ।
धितोपत्र बोर्डका अध्यक्ष भीष्मराज ढुंगानाले आफु अध्यक्ष भएलगतै एक समारोहमा सम्बोधन गर्दै छिटै समय थप्ने प्रतिबद्धता व्यक्त गर्नुभएकोमा सो प्रतिबद्धता पुरा गर्ने तयारीमा आफु लाग्ने बताउनुभएको थियो । सोहि अनुसार सेयर कारोबार हुने दोश्रो बजारको समय थपिने निर्णय भएको छ । आउँदो आइतबारदेखि कारोबार समय ५ घण्टा बनाउने तयारी भएको छ।
यसअघि ४ घण्टा मात्र रहेको सेयर कारोबारको समय आइतबारदेखि एकघण्टा थपेर ५ घण्टा बनाइने नेपाल धितोपत्र बोर्डका अध्यक्ष भीष्मराज ढुंगाना बताउनुभएको छ । कारोबार एकघण्टा थप्ने विषयमा बोर्डले अध्ययन गरेर बताउन भनी नेप्सेलाई निर्देशन दिएकोमा नेप्सेले समेत सकारात्मक प्रतिक्रिया दिएपछि अवधि बढाउने निश्चित भएको हो ।
सम्पूर्ण तयारी पुरा भएको र आउँदो आइतबार देखि बिहान १०ः३० बजे कारोबार शुरु भई ३ः३० मा कारोबार बन्द हुने उहाँले बताउनुभयो ।
हाल दोश्रो बजारमा सेयरको कारोबार अवधि प्रत्येक आइतबारदेखि बिहीबारसम्म बिहान ११ बजेदेखि कारोबार खुलेर दिउँसो ३ बजे बन्द हुने गरेको छ । यसरी हाल ४ घण्टामा सीमित कारोबार अवधि एकघण्टा बढेर अब ५ घण्टा हुनेछ ।
वि.सं.२०७६ फागुन ३० शुक्रवार ११:३८ मा प्रकाशित