काठमाडौं । कोरोना संक्रमणको सन्त्रास विश्वभर फैलिरहेका बेला मास्कको कृत्रिम अभाव सिर्जना गर्ने्विरुद्ध प्रहरीले अपरेसन सुरु गरेको छ।
सर्वसाधारणले मास्कको अभाव बेहोरिहेका बेला कृत्रिम अभाव सिर्जना गरिएको भन्दै प्रहरीले अपरेसन नै सुरु गरेको हो । सो क्रममा प्रहरीले काठमाडौंबाट शनिबार र आइतबार मात्रै करिब साढे २ लाख थान मास्क नियन्त्रणमा लिएको छ ।
महानगरीय प्रहरी परिसर काठमाडौंले आइतबार राजधानीको कपन क्षेत्रबाट ३ रुपैयाँमा खरिद गरेर ४० रुपैयाँमा बिक्री गर्न लाग्दा १ लाख ६० हजार थान मास्क नियन्त्रणमा लिएको हो । सो क्रममा सात जना पक्राउ परेका छन् ।
महानगरीय प्रहरी परिसर काठमाडौंका प्रमुख एसएसपी उत्तमराज सुवेदीले प्रहरीले मास्कको कृत्रिम अभाव सिर्जना गर्ने्विरुद्ध अपरेसन सुरु गरेको बताए ।
‘मास्कको कृत्रिम अभाव सिर्जना गरी कालोबजारी गर्ने्विरुद्ध प्रहरीको अपरेसन सुरु भएको छ, यो शृंखला निरन्तर अघि बढ्छ,’ परिसरका प्रमुख सुवेदीले राजधानीसँग भने । उनका अनुसार शनिबार मात्रै प्रहरीले राजधानीकै खुसिबु क्षेत्रबाट ७९ हजार थान मास्कसहित आठ जनालाई पक्राउ गरेको थियो ।
प्रहरीले खुद्रा औषधि पसल सञ्चालकहरूमार्फत कालोबजारी सिर्जना गर्ने मास्कको कारोबारमा संलग्न ठूला व्यापारीमाथि निगरानी राख्दै आएको छ । प्रहरीले मास्क स्टोर गरिएको स्थानबाट कारोबार गर्दै गर्दा उनीहरूलाई नियन्त्रणमा लिएको हो । सो क्रममा बरामद मास्कको संख्या अझै बढ्न सक्ने प्रहरीको भनाइ छ ।
प्रहरीले शनिबार पक्राउ परेकाहरूको विवरण खुलाएको भए पनि आइतबार पक्राउ परेकाहरूको भने विवरण खुलाएको छैन । शनिबार मञ्जुश्री सप्लायर्सका गोदाम मालिक काभ्रेका मिन्टु तामाङ, नागार्जुन– २ का अनिश कार्की, उज्जल अधिकारी, काभ्रे रोशी–९ का मानकाजी लामा, बाजुराका थुमराज उपाध्याय, नृप कार्की, काभ्रेका गणेश तामाङ र रामेछापका शिव खड्का पक्राउ परेका थिए ।
उनीहरूविरुद्ध प्रहरीले कालोबजारी ऐनअनुसार म्याद थप गरेर अनुसन्धान थालेको छ ।
वि.सं.२०७६ चैत ३ सोमवार १०:४९ मा प्रकाशित
