काठमाडौं । जनउत्थान सामुदायिक लघुवित्त वित्तीय संस्थाकोे नवौं वार्षिक साधारण सभा चैत २७ गते हुने भएको छ । कम्पनीले होटल न्यू इरा, बुटवल, रुपन्देहीमा बिहान ११ बजे सभा बोलाएको हो ।
कम्पनीको चैत ४ गते बसेको सञ्चालक समितिको १४९औं बैठकले साधारण सभा गर्ने निर्णय गरेको हो । सभाको प्रस्तावमा हाल कायम चुक्तापूँजीको २५ प्रतिशतका दरले बोनस शेयर र कर प्रयोजनका लागि १ दशमलव ३२ प्रतिशत नगद लाभांश वितरण गर्न स्वीकृति प्रदान गर्ने रहेको छ ।
सभाको अन्य प्रस्तावमा बोनस शेयर वितरण पश्चात कायम रहने चुक्ता पूँजीको १ बराबर २ को अनुपातमा हकप्रद शेयर निष्कासन गर्ने रहेको छ ।
साथै, एक वा एकभन्दा बढि उपयुक्त लघुवित्त वित्तीय संस्थाहरु मर्जर तथा प्राप्ति सम्बन्धी सम्पूर्ण कार्य गर्न सञ्चालक समितिलाई अख्तियारी दिने, कम्पनीको प्रबन्धपत्र तथा नियमावलीमा संशोधन गर्ने, संस्थाको अधिकृत पूँजी वृद्धि गर्ने लगायतका प्रस्ताव पनि रहेको छ ।
उक्त साधारण सभा प्रयोजनका लागि कम्पनीले चैत १४ बुक क्लोज गर्ने भएको छ । चैत १३ गतेसम्म नेप्सेमा कारोबार भई कायम शेयरधनीहरुले मात्र सभामा भाग लिन तथा लाभांश प्राप्त गर्न सक्नेछन् ।
वि.सं.२०७६ चैत ५ बुधवार ११:५२ मा प्रकाशित
