काठमाडौं । नेपाल वायुसेवा निगमले करारमा रहेका एकतिहाइ कर्मचारीलाई बिदा दिएको छ । करार सेवामा रहेका एक तिहाइलाई बेतलबी बिदा दिइएको निगमले जनाएको छ ।
निगमले करार सेवामा रहेका १५० एयर होस्टेस, १० विदेशी पाइलट र ५ नेपाली पाइलटलाई बेतलबी बिदा दिएको हो । निगमले दिएको जानकारीअनुसार केहीलाई १० दिनको, केहीलाई २ साताको र केहीलाई अर्को सूचना जारी नभएसम्मका लागि बिदा दिइएको हो ।
यसैगरी त्रिभुवन अन्तराष्ट्रिय विमानस्थलको व्यवस्थापन कार्यमा संलग्न करारका कर्मचारीलाई पनि निगमले बिदा दिएको छ । विमानस्थलको ग्राउन्ड ह्यान्डलिङको जिम्मेवारी निगमले लिएको छ ।
निगमले भारतको नयाँदिल्ली, मुम्बई र बैंगलोरमा गर्दै आएको नियमित उडान चैत ९ गतेदेखि लागू हुने गरी स्थगित गरेको छ । निगमले चैत ९ गतेदेखि उडान स्थगित गरिएको अवधिभरका लागि टिकट खरीद गरेका यात्रुहरुलाई टिकट फिर्ता गर्दा पुरै रकम उपलब्ध गराइने पनि जनाएको छ ।
वि.सं.२०७६ चैत ७ शुक्रवार १०:२७ मा प्रकाशित