काठामाडौं । नेपाल सरकारले एक महिनासम्म २५ जनाभन्दा बढी भेला हुन नपाउने व्यवस्था गरेसँगै दोस्रो बजारमा सूचिकृत १५ वटा कम्पनीको साधारणसभा प्रभावित हुने भएको छ ।
सेञ्चुरी कमर्सियल बैंकले शुक्रबार सार्वजनिक सूचना जारी गरी चैत १४ गते हुने भनिएको साधारणसभा रोकेको हो । त्यस्तै अपि पावर कम्पनीले आजका लागि तय भएको साधारणसभा पनि अनिश्चितकालका लागि स्थगित गरेको छ ।
सूचिकृत कम्पनीमध्ये १५ वटा कम्पनीले साधारणसभा डाकेका थिए । केही कम्पनीले साधारणसभा रोकिएको सूचना जारी गरे पनि अधिकांश कम्पनी साधारणसभा रोक्ने तरखरमा छन् ।
तीन विकास बैंक, ६ वटा लघुवित्त वित्तीय संस्था, तीनवटा बिमा कम्पनी, दुईवटा हाइड्रोपावर कम्पनी र एउटा वाणिज्य बैंकको साधारणसभा प्रभावित भएको हो ।
मितेरीले शनिबार साधारणसभा डाकेको छ । त्यस्तै सहयोग विकास बैंक चैत १० गते, एक्सेल डेभलपमेन्ट चैत २० गते, मिर्मिरे लघुवित्त चैत १७ गते, जनउत्थान चैत १९ गते, वमी लघुवित्त चैत १६ गते, एनएमबी लघुवित्त वैशाख १६ गते, महिला सहयात्री लघुवित्त चैत २२ गते, स्वेडा लघुवित्त चैत ३० गते, नेपाल इन्स्योरेन्स कम्पनी चैत २१ गते, सिद्धार्थ इनस्योरेन्स कम्पनी चैत २८ गते, जनरल इन्स्योरेन्स कम्पनीले चैत १४ गते साधारण सभा डाकेका थिए ।
साधारणसभा सञ्चालन हुन कम्तिमा पनि ५१ प्रतिशत सेयरधनी उपस्थित हुनुपर्छ। सूचीकृत कम्पनीहरुमध्ये कसैको २५ भन्दा कम सेयरधनीले साधारणसभाले सम्भव हुँदैन । सरकारले नै हाइ अलर्ट गराएको बेलामा साधारणसभा हुन नसक्ने अवस्था आएको हो ।
वि.सं.२०७६ चैत ७ शुक्रवार १९:४६ मा प्रकाशित