धनकुटा । भेडेटारका होटल व्यावसायी लिलाराज लावतीले क्वारेनटाइनका लागि होटलको कोठा निःशुल्क उपलब्ध गराउने भएका छन् । भेडेटार स्थित होटल लावती कर्नरका संचालक लावतीले क्वारेनटाइनका लागि होटलका पाँच वटा कोठा उपलब्ध गराउने घोषणा गरेका हुन् ।
कोरोना भाइरसको संक्रमणले विश्वलाई नै आक्रान्त पारिरहेका बेला सहयोग गर्नु मानवीय कर्तव्य भएकाले क्वारेनटाइनका लागि कोठा उपलब्ध गराउँने लावतीले बताए । ‘क्वारेनटाइनका लागि आवश्यकता परेमा म कोठा दिन तयार छु ।’ लावतीले भने, ‘यसका लागि प्रशासनले समन्वय गर्नुपर्छ ।’
पूर्वी नेपालको प्रमुख पर्यटकीयस्थल, धेरै मानिसको भीडभाड हुने ठाँउ र धनकुटा प्रवेशको प्रमुख नाका भएकाले भेडेटारमा कोरोनाको उच्च सर्तकता अपनाउनुपर्ने भएपनि हालसम्म सतर्कता सम्बन्धि ठोस काम नहुँदा जोखिम बढेको उनले बताए ।
वि.सं.२०७६ चैत ९ आइतवार १७:०१ मा प्रकाशित