काठमाडौं । धितोपत्र बजार ५ दिनका लागि बन्द हुने भएको छ । नेपाल धितोपत्र बोर्डले आफ्नो अधिकार प्रयोग गरी सोमबारदेखि ५ कारोबार दिनका लागि बजार बन्द गर्ने निर्णय गरेको हो ।
धितोपत्र बजार बन्द हुने भएपछि सेयर बजार कारोबार नेप्से पनि आउने आइतबारसम्म बन्द हुनेछ । र, अर्को सूचना जारी नभए सोमबारबाट कारोबार स्वतः खुल्नेछ ।
कोरोना भाइरसको जोखिमको त्रासले गर्दा लगानीकर्ता तथा सदस्य दलालको धितोपत्र कारोबारमा सहभागिता घटदो क्रममा रहेको छ । यही अवस्था अध्ययन गरी बोर्डले जोखिम न्यूनीकरण गरी लगानीकर्ता, सदस्य दलाल, कर्मचारी आदिको स्वास्थ्यलाई उच्च प्राथमिकता दिई दोस्रो बजारमा हुने नयाँ कारोबार केही समयका लागि बन्द गर्न आवश्यक देखिएको बताएको छ ।
धितोपत्र सम्बन्धी ऐन, २०६३ मा बोर्डलाई ५ दिन बजार बन्द सक्ने विशेष अधिकार छ । सोही अधिकार प्रयोग गरी बोर्डले बजार (नेप्से) सँग परामर्श गरी धितोपत्र बजार बन्द गरेको हो । बोर्डको सञ्चालक समितिको बैठकले नेपाल स्टक एक्सचेन्जलाई ५ दिन बजार बन्द गर्न आदेश दिएको हो ।
वि.सं.२०७६ चैत ९ आइतवार २०:४७ मा प्रकाशित