कोरोनाविरुद्ध जुध्न नेपाल सरकारलाई एनआरएनएको १ करोड रुपैयाँ सहयोग

काठमाडौं । कोरोना महामारीसँग लड्नको लागि गैरआवासीय नेपाली संघ (एनआरएनए) ले आर्थिक सहयोगको घोषणा गरेको छ ।

गैरआवासीय नेपाली संघको आइतबार बसेको ७२ औं बैठकले सरकारले कोरोना संक्रमणको महामारीविरुद्ध लड्न र संक्रमण भएको खण्डमा उपचार तथा अन्य उपकरण तथा औषधीजन्य सामाग्री सहज गर्न खडा गरेको केन्द्रीय राहत कोषमा एक करोड रुपैयाँ प्रदान गर्ने निर्णय गरेको संघका अध्यक्ष कुमार पन्तले जानकारी गराउनुभएको छ ।

आइतबार साँझ बसेको मन्त्रिपरिषदको बैठकले शुरुमा सरकारको तर्फबाट ५० करोड रुपैयाँ राखेर कोष खडा गरेको थियो । अध्यक्ष पन्तले संघको निर्णय सार्वजनिक गर्दै फेशबुकमा लेख्नुभएको छ,”संघले कोरोना संक्रमितको सहयोगार्थ अध्यक्ष कुमार पन्तको अध्यक्षतामा एक उच्चस्तरीय समिति र त्यसमातहत संघका कोषाध्यक्ष महेशकुमार श्रेष्ठको संयोजकत्वमा राहतकोष संकलन उपसमिति र उपाध्यक्ष डा.बद्री केसीको संयोजकत्वमा भौतिक सामग्री सहयोग संकलन उपसमिति गठन गरेको छ ।”

त्यस्तै, संघले विश्वभर छरिएका आफ्ना शाखामार्फत् कोरोना संक्रमित नेपालीको तथ्यांक संकलनको तयारी समेत गरेको पन्तले जनाउनुभएको छ ।

२०७६ चैत्र १० गते ०७:३७ मा प्रकाशित

You can share this post!

अन्तर्राष्ट्रिय उडानमा प्रतिबन्ध, कस्ता एयरलाइन्स नेपाल आउन पाउँछन् ? 

कोरोना नियन्त्रणका लागि बागमती सरकारले छुट्यायो पाँच करोड

Related posts