पर्वत । कोरोना संक्रमण भएको पुष्टि भएकी बाग्लुङकी युवतीसँगै जहाजमा यात्रा गरेका पर्वतका एक युवकलाई आइसोलेसनमा राखिएको छ।
जलजला गाउँपालिका–७ धाइरिङका ती युवकले बाग्लुङकी युवतीसँगै यति एयरको विमानमा यात्रा गरेको र यात्राको दुई दिनपछि ज्वरो आउनुका साथै अहिले पनि रुघाखोकी लागिरहेको पाइएको छ ।
गत चैत्र ५ गते दिउँसो पौने एक बजे यति एयरको ६७९ नम्बरको उडानबाट पर्वतका ती युवक बाग्लुङकी युवतीसँगै काठमाडौँबाट पोखराबाट आएको पाइएको छ ।
घर फर्किएको दुई दिनमा ज्वरो आएपछि उनले सिटामोल किनेर खाएका थिए। युवतीमा कोरोनाको संक्रमण भएको पुष्टि भएपछि मात्रै ती युवकले समेत आफैँलाई पनि संक्रमण भएको हुन सक्ने शङ्का गरेका थिए ।
पर्वत अस्पतालका निमित्त मेडिकल सुपरिटेन्डेन्ट डा. शिशिर देवकोटाले युवकमा देखिएका लक्षणहरू कोरोनाको लक्षणसँग मिल्ने भएको र उनको अहिलेको अवस्था सामान्य रहेको बताए। ‘उहाँ मसँग निरन्तर सम्पर्कमा हुनुहुन्छ ।
उहाँको स्वाब परीक्षण गर्ने तयारी थालिएको छ ।.,’ उनले भने, ‘तत्कालका लागि उहाँलाई घरमा नै सेल्फ क्वारेन्टाइनमा बस्न लगाइएको छ ।’ शंका गरिएका ती युवक गाउँमा फर्किएपछि घरमै भएको श्राद्धमा सामेल भएका पाइएको छ भने त्यो श्राद्धमा छिमेकी र इष्टमित्र समेत गएका थिए ।
जलजला गाउँपालिकाका प्रमुख यामबहादुर मल्लले ती युवक गाउँमा समेत डुलेको पाइएको र स्वास्थ्यकर्मीको सल्लाहअनुसार तत्कालका लागि आइसोलेसनमा रहेको बताए।
युवकलाई घरमै पुगेर भेटका कुस्मा नगरपालिका–७ का उनका एकजना आफन्तलाई समेत क्वारेन्टाइनमा राख्ने तयारी भएको छ । उनलाई कुस्मा नगरपालिका–६ स्थित शिवालय माविको क्वारेन्टाइनमा राख्ने तयारी भएको वडा नम्बर ६ का वडाध्यक्ष रुद्र गिरीले बताए।
वि.सं.२०७६ चैत १७ सोमवार ०७:४० मा प्रकाशित