एजेन्सी । बेलायतमा लकडाउन (बन्दाबन्दी) को घोषणा गरिएको एक हप्ता भएको छ । तर, मानिसहरूले बन्दाबन्दीका नियमलाई खासै पालन गरिरहेको देखिएको छैन ।
त्यसैले बेलायतका एक शीर्ष स्वास्थ्य अधिकारीले सामाजिक दूरीका उपायहरू ६ महिनासम्म लम्ब्याउन सकिने सुझाव दिएका छन् भनी बेलायतका प्रमुख पत्रिकाहरूले पहिलो पृष्ठको समाचार बनाएका छन् ।
कोरोनाभाइरस महाव्याधिको गाम्भीर्यलाई धेरै बेलायतीहरूले नबुझेको र सरकारले सूचना प्रवाह गर्दा अलिक सिर्जनात्मकता देखाउनुपर्ने प्रहरी कमिस्नर डेभिड जेमीसनले बताएका छन् ।
वेस्ट मिडल्यान्ड्समा केही मानिसले भाषिक अवरोधका कारण महत्त्वपूर्ण सन्देशमा पहुँच नपाइरहेको उनको भनाइ छ । भारीभरकम सन्देश दिइएकाले किशोरहरूमाझ सन्देश पुग्न नसकेको पनि उनले बताए ।
वेस्ट मिडल्यान्ड्समा संक्रमण व्यापक रूपमा फैलिरहेको र मृत्यु संख्या पनि बढिरहेको स्थिति छ । बेलायतमा अहिले १९ हजार ५२२ जनामा संक्रमण देखिएको छ भने १२ सय २८ जनाको मृत्यु भएको छ ।
वि.सं.२०७६ चैत १७ सोमवार १२:५५ मा प्रकाशित
