एजेन्सी । कोरोना भाइरसको त्रास बढेपछि इरानका कैदीबन्दीले गरे जेलमा तोडफोड कोरोना भाइरसको त्रास बढेपछि दक्षिणी इरानको एक जेलमा कैदीबन्दीहरूले तोडफोड गरेका छन् ।
इरानमा अहिलेसम्म ४० हजार मानिस संक्रमित भएका छन् भने दुई हजार सात सय ५७ को मृत्यु भएको छ । इरानको समाचार संस्था आइआरएनएले फारस प्रान्तका गभर्नर इनायतुल्लाह रहमीलाई उद्धृत गर्दै आइतबार बिहान दक्षिण पश्चिमी सहर सिराजको आदेल आबाद कारागारमा विरोध प्रदर्शन भएको जनाएको छ ।
देशमा भाइरस संक्रमणको त्रास बढ्दै गएपछि उनीहरूले रिहाइको माग गर्दै तोडफोड गरेका हुन् । रहमीका अनुसार कैदीहरूले जेलभित्र तोडफोड गरेका थिए, तर कोही घाइते भएका छैनन् ।
कोरोना भाइरसको संक्रमण बढेपछि इरानले यसअघि एक लाख कैदीबन्दीलाई रिहा गरेको थियो । आइआरएनएले जनाएअनुसार शुक्रबार इरानको पश्चिमी कुर्दिस्तान प्रान्तको साक्केज जेलमा गार्डलाई कुटपिट गरी ७० जना कैदीबन्दी भागेका थिए । भागेकामध्ये केही कैदी पुनः जेलमा नै फर्किएर आएका थिए ।
इरानमा यस वर्षको सुरुवातदेखि नै अलिगुदरज, हामेदन र तब्रिजको जेलमा पनि तोडफोड भएको थियो र केही कैदी त्यहाँबाट भागेका थिए ।
इरानका स्वास्थ्य अधिकारीका अनुसार ४० हजार संक्रमितमध्ये १४ हजार निको भइसकेका छन् भने तीन हजार पाँच सय गम्भीर अवस्थामा रहेका छन् ।
विश्वभर अहिलेसम्म सात लाख २० हजार मानिस संक्रमित भएका छन् भने ३४ हजारको मृत्यु भएको छ र एक लाख ५० हजार मानिस निको भइसकेका छन् ।
वि.सं.२०७६ चैत १७ सोमवार १९:१२ मा प्रकाशित
