क्वालालम्पुर । विश्वभर नोभेल कोरोना भाइरसको संक्रमणबाट बच्नका लागि मानिसहरुलाई घरबाट ननिस्किन आदेश जारी गरिएका छन् । तर, मलेसियाका आदिवासी भने कोरोना भाइरसको संक्रमणबाट बच्नका लागि जंगलतिर भागेका छन् ।
मलेसियामा पहिलो आदिवासी ओराङ अस्ली समुदायका एकजनामा गत साता कोरोना संक्रमण देखिएपछि उनीहरु जंगल पसेका हुन् । जेमेरीको गाउँ जाने बाटो बन्द गरिएको छ ।
आदिवासी स्थानीय तथा अधिकारकर्मी बेदुल चेमाइले भने, “हामी आइसोलेसनका लागि फेरि जंगलमा जाँदैछौं । हामी हाम्रा लागि आफैं खाना खोज्छौं । जंगलमा कसरी खानेकुरा खोज्ने भन्ने विषयमा हामीलाई थाहा छ । त्यहाँ हामीले केही रोपेका छौं ।“
ओराङ अस्ली मलेसियाको अति विपन्न समुदाय हो । गरिबी र कुपोषणले यस समुदायलाई निकै जोखिममा पार्छ । गत वर्ष एकै गाउँमा १५ जना दादुराका कारण मृत्यु भएका थिए ।
मलेसियामा हालसम्म कोरोना संक्रमितको संख्या तीन हजार ३३३ छ भने ५३ जनाको मृत्यु भएको छ । यो संख्या दक्षिण पूर्वी एसियाको सबभन्दा ठूलो संख्या हो । -बीबीसी
वि.सं.२०७६ चैत २१ शुक्रवार १७:२६ मा प्रकाशित
