काठमाडौँ । सरकारले आन्तरिक हवाइ उडान वैशाख १८ गतेसम्म बन्द गर्ने निर्णय गरेको छ । उपप्रधान एवं रक्षामन्त्री ईश्वर पोखरेल नेतृत्वको उच्चस्तरीय समितिले उडान रोक्ने निर्णयलाई थप १५ दिन लम्ब्याएको हो ।
यसअघिको निर्णय अनुसार वैशाख ३ गतेसम्म उडान रोकिएको थिए । सरकारले अन्तराष्ट्रिय हवाइ उडानलाई वैशाख १८ गतेसम्म रोक्ने निर्णय गरिसकेको छ ।
समितिले आपूर्तिलाई सहज राख्ने तथा सुरक्षालाई समन्वय गरेर अगाडी लैजाने निर्णय गरेको छ । समितिले राहात पाउने भनेर छुट्टयाईएकाहरुलाई बस्तुगत रुपमा राहत उपलब्ध गराउने निर्णय समितिका सदस्य सचिव नारायण विडारीले जानकारी दिए ।
साथै समितिले लकडाउन कडा बनाउने र उलंघन गर्नेलाई कानुन अनुसार जेल सजायसम्म गर्न निर्णय गरेको छ । त्यस्तै अफगानिस्तानमा यूएन अन्तर्गत काम गरिरहेका नेपाली नागरिकहरुलाई उद्दार गर्ने निर्णय गरेको छ । विडारीले युएनले नै उद्धार गर्न अनुरोध गरेकाले यो निर्णय गरेको जानकारी दिएका छन् ।
समितिले परिक्षण, पहिचान र उपचार जोड दिने निर्णय गर्दै कोरोना फैलिन नदिने निर्णय गरेको छ । साथै स्वास्थ्य सामग्री खरीद प्रक्रियालाई निजी क्षेत्रले ल्याउने सामाग्रीलाई सहजीकरण गर्ने स्वास्थ्य बिभागले खरिद गर्ने प्रक्रिया अगाडी बढाउने तथा जिटुजी माध्यमबाट खरिद हुने प्रक्रिया अगाडी बढेको जानकारी बिडारीले दिए ।
जिटुजीको खरिद प्रक्रिया आजै टुंगिने उनले बताएका छन् । त्यस्तै त्रिभुवन विश्वविद्यालयमा रहेको पिसिआर मेशिनलाई प्रदेश २ मा पठाउने निर्णय समितिले गरेको छ ।
वि.सं.२०७७ वैशाख ३ बुधवार १९:३० मा प्रकाशित
